Тошкент ҳайвонот боғида жирафа вафот этди. Бу ҳақда боғ расмий каналида хабар қилинди.
«Ходимлар, ветеринария хизмати ва хорижий ветеринар мутахассисларнинг барча саъй-ҳаракатларига қарамай, биз жирафамиздан айрилдик.
Биз жирафани сақлаб қолиш учун барча даволаш усулларини қўлладик. Жумладан, халқаро ветеринария видеоконференсияларида иштирок этган мутахассисларнинг ёрдами ва хорижий ҳамкасблар билан ўтказилган маслаҳатлашувдан фойдаландик.
Афсуски, энг ёмон тахмин тасдиқланди: патологанатомик текширув натижалари жирафанинг ўлимига ошқозон буралиши сабаб бўлганини кўрсатди. Барча ҳаракатларимизга қарамай, натижа фожеавий бўлди. Жирафаларнинг анатомик ва физиологик хусусиятлари туфайли, уларнинг ошқозон-ичак тизимида жарроҳлик амалиётларини ўтказиб бўлмайди. Чунки жаҳон амалиётида бундай касалликларни муваффақиятли даволаш ҳолатлари мавжуд эмас» , — дейилади хабарда.
