Аввалроқ хабар берганимиздек, Шавкат Мирзиёев Республика маънавият ва маърифат кенгашининг кенгайтирилган йиғилишини ўтказмоқда. Йиғилишда Президент «дунёдаги қудратли марказлар очиқчасига босим ўтказишни» бошлаганига айтди.
Шавкат Мирзиёевнинг айтишича, айни вақтда азалий қадриятлар, ижтимоий-сиёсий қарашлар тизимида чуқур трансформация жараёнлари юз бермоқда.
«Илгари ўз мақсад ва манфаатларини асосан дипломатия ва сиёсат билан ҳимоя қилиб келган дунёдаги қудратли марказлар энди очиқчасига босим ўтказиш, қарама-қаршилик ва тўқнашувлар йўлига ўтганига ҳаммамиз гувоҳмиз. Афсуски, бундай кенг кўламли ва ўта зиддиятли жараёнларнинг таъсири Марказий Осиё минтақаси ва унинг таркибий қисми бўлган мамлакатимизни ҳам четлаб ўтмаяпти», дейди Шавкат Мирзиёев.
Давлат раҳбари шундай мураккаб ва таҳликали вазиятда Ўзбекистоннинг миллий манфаатларига жавоб берадиган тўғри йўлни топиш албатта осон бўлмаётганини билдирди. Шунингдек, дунёдаги узоқ-яқин барча давлатлар билан ўзаро манфаатли алоқаларни ривожлантиришга ҳаракат қилинишини айтиб ўтди.
Эслатиб ўтамиз, Россиялик ёзувчи собиқ СССР давлатларини, жумладан Ўзбекистонни Россия таркибига қўшиб олишни таклиф қилган эди.
Шундан сўнг Олий Мажлис депутатлари Иномжон Қудратов ҳамда Бобур Бекмуродовлар россиялик амалдорга жавоб қайтарди.
