Нью-Йоркдан Тошкентга учаётган Uzbekistan Airways авиакомпанияси ҳаво кемасида зўравонлик қилган йўловчи туфайли Санкт-Петербург аэропортига фавқулодда қўнишга мажбур бўлди. Бу ҳақда миллий авиакомпания матбуот хизмати хабар қилмоқда.
Маълум қилинишича, ҳодиса бугун, 11 декабрь куни Тошкент вақти билан 07:35 да HY102 Нью-Йорк – Тошкент рейсида содир бўлди. Боеинг 787 ҳаво кемаси сардори йўналиш бўйлаб муқобил аэродромга қўнишга қарор қилди. Бортдаги муаммо ҳақида радиоалоқа орқали хабар берилди. 1991 йилда туғилган Ўзбекистон фуқароси полиция ходимлари томонидан рейсдан олинди.
Керакли процедуралар амага оширилгач, ҳаво кемаси белгиланган аэропортга парвозни давом эттиради.
HY102 рейсининг Тошкентга етиб келиши Тошкент вақти билан 13:00 га белгиланган.