Сайёрамизда ҳаво ҳарорати ўзгариши турли табиий офатлар билан бирга, хавфли инфекциялар ва касалликлардан ўлим кўрсаткичи ортишига сабаб бўляпти. Қолаверса, очарчилик туфайли кўплаб инсонлар ҳаётдан кўз юммоқда.
Масалан, Африка мамлакатларида глобал исиш оқибатида юзага келган қурғоқчилик ва сув тошқинлари 47 миллион кишини очарчиликка дучор этди. Ичимлик суви танқислиги эса айрим минтақаларда вабо эпидемиясининг авж олишига туртки бўлди.
Жаҳон соғлиқни сақлаш ташкилоти маълумотларига кўра, дунёда тахминан 222 миллион киши озиқ-овқат хавфсизлигининг юқори даражасидан азият чекмоқда. Улар кунига зўрға бир маҳал овқатланиш қурбига эга. Яна 45 миллион одам очарчилик ёқасида.
Бирлашган миллатлар ташкилоти маълумотига кўра, буларнинг барчаси Ер куррасида ҳаво ҳарорати 1,2 даража ортгани асоратидир. Вазият шундай давом этаверса, бу кўрсаткич яқин келажакда 2 баравар ошиши ҳеч гап эмас. Ўшанда инсоният глобал қурғоқчилик, тошқинлар ва янада хавфли эпидемиялар билан рўбарў келиши мумкин экан.
