Қўқонда эркак ҳомиладор турмуш ўртоғига ҳужум қилганидан сўнг кичик ёшли ўғлини иккинчи қават деразасидан ташлаб юборди. Оғир жароҳат олган бола вафот этди. Аёл эса қўшнилардан ёрдам сўраш учун уйдан чиқиб кетишга улгурган.
Фожиа 2026 йил 6 май куни содир бўлган. Аёлнинг кўрсатмасига кўра, воқеадан бироз олдин эри диний қарашлар асосида унга руҳий босим ўтказиб, ўзи ва боласини ўлдириш билан таҳдид қила бошлаган.
Эрталаб эркак турмуш ўртоғи ва ўғлига ташланиб, уларни бўғишга уринган. У аёл ва боладан калимаи шаҳодатни айтишни талаб қилган, рад этишса, уларга зўравонлик қилиш билан таҳдид қилган. Аёл қутулиб, хонадондан чиқиб кетишга муваффақ бўлган пайтда эркак болани иккинчи қават деразасидан ташлаб юборган.
Суд-тиббий экспертизаси хулосасига кўра, бола ўлимга сабаб бўлган кўплаб жароҳатлар олган.
Суд-психиатрия экспертизаси Акбаржон Ҳайдаровда шизофрения аломатлари билан кечувчи ўткир полиморф психотик бузилиш мавжудлигини аниқлаган. Экспертлар жиноят содир этилган вақтда у ўз ҳаракатларининг хусусияти ва хавфлилигини англай олмагани ҳамда уларни бошқара олмагани ҳақида хулоса берган.
Суд эркакни Жиноят кодексининг айбловда кўрсатилган моддалари бўйича айбдор деб топди. Бироқ унинг ақли норасолиги аниқлангани сабабли Тошкентдаги Республика психиатрия шифохонасига кучайтирилган кузатув остида мажбурий даволанишга юбориш ҳақида қарор чиқарди.
