Самарқанд вилоятида «Жартепа» эркин савдо ҳудудини ишга туширишга тайёргарлик жадаллаштирилмоқда. У чегараолди савдосини соддалаштириш, логистикани яхшилаш ва Тожикистонга экспорт имкониятларини кенгайтиришга хизмат қилиши кутилмоқда.
Инвестициялар, саноат ва савдо вазирлиги маълум қилишича, вазир ўринбосари Иброҳим Эргашев Ургут туманида ҳудудни ташкил этиш ишлари билан танишди. Шунингдек, у маҳаллий ҳокимлик ва тадбиркорлар вакиллари билан учрашди.
Учрашувда савдо ва логистика инфратузилмасини яратиш, божхона назоратини ташкил этиш, кириш йўлларини қуриш ҳамда чегарадан ўтиш тартибини соддалаштириш масалалари кўриб чиқилди.
Тожикистон Иқтисодий ривожланиш ва савдо вазирлиги ҳамда Панжикент маъмурияти вакиллари билан видеоконференция шаклидаги мулоқотда чегараолди савдоси шартлари ва ҳудудни ишга тушириш бўйича кейинги қадамлар муҳокама қилинди.
Шунингдек, вилоятнинг 50 дан ортиқ экспортчиси билан очиқ мулоқот ўтказилди. Тадбиркорлар логистика, божхона тартиб-таомиллари, молиялаштириш ва сертификатлаштиришга оид 30 дан ортиқ масалани кўтарди. Мурожаатларнинг бир қисми жойида ҳал этилди.
Учрашув якунлари бўйича масъул ижрочилар ва вазифаларни бажариш муддатлари белгиланди. «Жартепа»ни ишга туширишни тезлаштириш, савдодаги тўсиқларни бартараф этиш ва экспортчиларни қўллаб-қувватлашни кучайтириш вазифаси қўйилди.
В. Новиков
