Туркиянинг Cengiz Holding компанияси янги лойиҳаларни муҳокама қилмоқда
Туркиянинг Cengiz Holding компанияси Ўзбекистоннинг Сурхондарё ва Тошкент вилоятларидаги кўмир конларини геологик қидириш ва ўзлаштириш ишларида иштирок этиш имкониятларини кўриб чиқмоқда. Бу музокаралар мамлакатда кўмир қазиб олиш қарийб 7 фоизга камайган бир пайтда ўтказилмоқда.
Тоғ-кон саноати ва геология вазирлигида Cengiz Holding компаниясининг Ўзбекистондаги минтақавий раҳбари, «CENERGO» МЧЖ бош директори Жанер Карабай билан учрашув бўлиб ўтди.
Томонлар кўмир конларини геологик ўрганиш истиқболлари, истиқболли участкаларни ўзлаштиришга тайёрлаш ҳамда янги инвестиция лойиҳаларини амалга ошириш имкониятларини муҳокама қилди.
Вазирлик вакиллари бўлажак инвесторларни соҳанинг норматив-ҳуқуқий базаси ва лойиҳаларни амалга ошириш шартлари билан таништирди.
Ҳозирча гап фақат эҳтимолий ҳамкорликни муҳокама қилиш ҳақида бормоқда. Инвестиция келишуви тузилгани, режалаштирилаётган сармоя миқдори ва лойиҳаларни амалга ошириш муддатлари ҳақида маълумот эълон қилинмаган.
Кўмир конларига қизиқиш уни қазиб олиш ҳажми камайган бир пайтда пайдо бўлди. Расмий статистика маълумотларига кўра, 2026 йилнинг январь–сентябрь ойларида Ўзбекистонда 5,4 млн тонна кўмир қазиб олинган. Ўтган йилнинг шу даврида бу кўрсаткич 5,8 млн тоннани ташкил этган.
Шундай қилиб, кўмир қазиб олиш 400 минг тоннага ёки 6,9 фоизга камайган.
Туркиялик инвесторнинг қизиқиши кўмир саноатига реал сармоя киритишга олиб келадими ёки йўқми, ҳозирча номаълум.
В. Новиков
