Ўзбекистонда фуқаролар қатор хизматлардан фойдаланишда қоғоз ҳужжатлар ўрнига уларнинг электрон шаклини тақдим этиши мумкин. Адлия вазирлиги 2026 йил 20 октябрь куни 33 та идоравий ҳужжатга тегишли ўзгартишларни рўйхатдан ўтказди.
Электрон ҳужжатлар my.gov.uz портали ва «Ижтимоий карта» иловасида мавжуд бўлади. Улардан паспорт, ID-карта, туғилганлик ва никоҳ тўғрисидаги гувоҳномалар ўрнида фойдаланиш мумкин. Шунингдек, пенсия гувоҳномаси ва ногиронликни тасдиқловчи маълумотномаларнинг электрон шакли ҳам қабул қилинади.
Электрон ҳужжатлар банклар ва нотариал идораларда қабул қилинади. Улардан ички авиақатновларга рўйхатдан ўтишда, алоқа операторлари ва ломбардлар билан шартномалар тузишда ҳам фойдаланиш мумкин.
Бундан ташқари, электрон ҳужжатларни уруш қатнашчиларига компенсация расмийлаштириш ва қон топшириш жараёнларида тақдим этишга рухсат берилди. Улар тиббий-ижтимоий муассасаларда пуллик хизматлардан фойдаланишда ҳам қабул қилинади. Яна бир йўналиш — фуқароларни ҳарбий ҳисобга қўйиш.
Адлия вазирлиги ўзгартишларни 3958 ва 3959-сонлар билан давлат рўйхатидан ўтказди. Ушбу ҳужжатларда ташкилотлар қоғоз ҳужжатлар ўрнига электрон шаклларни қабул қилиши шарт бўлган ҳолатлар белгиланган.
