Санкт-Петербургда тадбиркорлар ҳуқуқларини ҳимоя қилиш бўйича вакил Валерий Калугин губернатор Александр Бегловга патент асосида ишлайдиган мигрантларни гўзаллик салонларига жалб қилиш тақиқини бекор қилишни сўраб мурожаат қилмоқчи. Бу ҳақда у 21 октябрь куни «Интерфакс» матбуот анжуманида маълум қилди.
Шаҳар ҳокимиятининг қарори 2026 йил 1 декабрдан кучга киради. У патент асосида ишлайдиган хорижликларга тақиқланган фаолият турлари рўйхатини кенгайтиради. Такси ва курьерлик хизматларидан ташқари, чекловлар озиқ-овқат маҳсулотлари чакана савдоси, суд-тиббий экспертиза, фитнес марказлари, спорт клублари, сартарошхоналар ва гўзаллик салонларини ҳам қамраб олади.
Калугин ушбу қарорни пухта ўйланмаган деб баҳолади ва унинг гўзаллик индустриясига таъсирини ўрганиш зарурлигини таъкидлади. Унинг фикрича, аввало мигрантларнинг бандлиги ва улар эгаллаган лавозимлар бўйича статистикани таҳлил қилиш, шундан кейингина кейинги қарорларни қабул қилиш лозим.
Гўзаллик индустрияси тадбиркорлари уюшмаси баҳолашича, Санкт-Петербургда ушбу соҳада 10 мингга яқин мигрант ишлайди. Уларнинг аксарияти соч турмаги нархи 300–500 рублни ташкил этадиган иқтисодий тоифадаги сартарошхоналарда фаолият юритади.
Уюшма вакилларининг фикрича, бу ходимларни маҳаллий мутахассислар билан қисқа вақт ичида алмаштириш қийин бўлади. Сартарошлик бўйича ҳатто бошланғич таълим олиш учун ҳам тахминан олти ой талаб этилади. Шу сабабли декабрь ойига қадар янги ходимларни тайёрлаш деярли имконсиз.
