Андижон халқаро аэропорти реконструкциядан сўнг соатига 200 нафар эмас, 1000 нафаргача йўловчига хизмат кўрсатиши мумкин. Келгусида аэропортнинг йиллик йўловчи оқимини 3,5 миллион нафарга етказиш режалаштирилган.
Президент Шавкат Мирзиёев Андижон вилоятига ташрифи доирасида халқаро аэропортни модернизация қилиш ишлари билан танишди.
Аэродром мажмуасини реконструкция қилиш лойиҳаси 1,1 триллион сўмга баҳоланган. Биринчи босқичда аэродром инфратузилмаси янгиланди. Учиш-қўниш йўлаги 3,3 километрга узайтирилиб, эни 60 метр бўлган янги йўлак барпо этилди. У 4E тоифаси талабларига жавоб беради.
Шунингдек, янги рулеж йўлаклари ва 10 та самолёт учун тураргоҳлар қурилди. Бу аэропортга йирик кенг фюзеляжли самолётларни қабул қилиш имконини берди.
Учиш-қўниш йўлагига хизмат муддати 50 йилгача бўлган цемент-бетон қопламаси ётқизилди. Германияда ишлаб чиқарилган ёруғлик-сигнал тизими ўрнатилиб, самолётларни тунги вақтда ва туманли об-ҳавода қабул қилиш имконияти яратилди. Қўниш 300 метргача кўриниш шароитида амалга оширилиши мумкин.
Ҳозир реконструкциянинг иккинчи босқичи давом этмоқда. Аэропорт ҳудудида қарийб 19,7 минг квадрат метр майдонга эга икки қаватли янги йўловчи терминали қурилмоқда.
Терминал ишга тушгач, аэропорт соатига 1000 нафаргача йўловчига хизмат кўрсата олади. Шунингдек, бу ерда юқори тезликдаги Wi-Fi ва интеллектуал хизматлар жорий этилади.
Айни пайтда Андижон аэропортидан етти авиакомпания мунтазам ички ва халқаро рейсларни амалга оширмоқда. Йиллик рейслар сонини 808 тадан 2500 тага етказиш режалаштирилган.
Давлат раҳбарига аэропортни янада ривожлантириш концепцияси ҳам тақдим этилди. Президент масъулларга янги терминал қурилишини ўз вақтида ва сифатли якунлаш бўйича топшириқ берди.
Аэропорт атрофида сервис объектларини ривожлантириш ҳам кўзда тутилган. Модернизация ишлари натижасида ҳудуднинг транспорт жиҳатдан қулайлиги ошиши, туризм ва иқтисодий имкониятларни кенгайтириш учун шароит яратилиши кутилмоқда.
