Тошкентда Бозсув канали бўйлаб 20 километр узунликда узлуксиз пиёдалар ҳудудини ташкил этиш режалаштирилмоқда. Лойиҳа «Шаҳидлар хотираси» ёдгорлик мажмуасидан Чилонзор туманигача бўлган ҳудудни қамраб олади. Уни бир ой ичида ишлаб чиқиш режалаштирилган.
Бу ҳақда пойтахтнинг ижтимоий-иқтисодий ривожланиши масалаларига бағишланган йиғилишда маълум қилинди.
Ободонлаштириш тажрибаси Олмазор туманидаги Кичкирик маҳалласида аллақачон амалга оширилган. Бу ерда канал бўйлаб 2,5 километрлик соҳил бўйи ҳудуди ташкил этилган, экопарк барпо қилинган ва 12,5 километр пиёдалар йўлаклари қурилган.
Шунингдек, пойтахт каналлари бўйидаги соҳил ҳудудларидан аҳоли учун хавфсиз сайр ва дам олиш масканлари сифатида фойдаланишни кенгайтириш режалаштирилмоқда.
Параллел равишда Тошкентда давлат мулки объектлари савдога чиқарилади. Фақат Олмазор туманининг ўзида умумий қиймати 100 миллиард сўм бўлган 52 та объект аукционга йўналтирилади. Объектларни тайёр лойиҳалар билан бирга тадбиркорларга бериш ишбилармонлик фаоллигини ошириш ва бюджет тушумларини кўпайтиришга хизмат қилиши кутилмоқда.
Кичик бизнесни қўллаб-қувватлаш мақсадида пойтахтда янги тадбиркорлар учун гаровсиз кредит лимити 100 миллион сўмдан 200 миллион сўмга оширилади. Шунингдек, кўп қаватли уйларнинг биринчи қаватларини савдо ва хизмат кўрсатиш объектларига мослаштиришга рухсат берилади.
Олмазор туманида ушбу чоралар орқали жорий йилда 300 нафар тадбиркорни қўллаб-қувватлаш ва қарийб 1 мингта иш ўрни яратиш режалаштирилган. Кейинчалик бу тажрибани пойтахтнинг бошқа туманларига ҳам татбиқ этиш кўзда тутилган бўлиб, натижада яна қарийб 20 мингта иш ўрни яратилиши кутилмоқда.
Мискин ва Иброҳим ота маҳаллалари ҳудудидаги саноат зонасини модернизация қилишга ҳам алоҳида эътибор қаратилмоқда. 305 гектар майдонда 504 та корхона фаолият юритади. Саноат ипотекаси, кредитлаш ва лизинг механизмлари орқали иш ўринлари сонини 35 мингтадан 100 мингтага етказиш, экспорт ҳажмини эса 600 миллион долларга ошириш режалаштирилган.
Кадрлар тайёрлаш тизимини ривожлантириш бўйича ҳам чоралар белгиланган. Олмазор касбий кўникмалар маркази негизида 400 ўринли IT-техникум ташкил этилади. Собиқ Тошкент архитектура-қурилиш коллежи биносида эса замонавий касб-ҳунар маркази жойлаштирилади.
Фуқароларни хорижда ишлашга тайёрлаш доирасида 500 киши учун немис тили курслари ташкил этилади, Чехия ва Словакия учун тиббиёт ходимлари тайёрланади. Германия, Япония, Жанубий Корея ва Буюк Британиядан 20 та йирик рекрутинг компаниясини ушбу ишларга жалб қилиш режалаштирилган.
Йил охирига қадар 42 гектар майдондаги «Ёшлар шаҳарчаси» талабалар шаҳарчасида IT-парк, юқори технологияли ишлаб чиқариш корхоналари ва таълим объектларини бирлаштирган инновацион кластерни ташкил этиш ишлари ҳам бошланади.
