Ўзбекистон Республикаси давлат мустақиллигининг 35 йиллиги муносабати билан тантанали маросим бўлиб ўтди. Унда Президент Шавкат Мирзиёев иштирок этиб, халқни байрам билан табриклади.
Давлат раҳбари нутқида мамлакатнинг сўнгги йиллардаги тараққиёти ва келгуси давр учун устувор вазифалар ҳақида тўхталди.
Хусусан, аҳолининг ўртача умр кўриш давомийлиги 1991 йилдаги 66,4 ёшдан 2025 йилда 75,4 ёшга етгани қайд этилди. Шунингдек, гўдаклар ва оналар ўлими кўрсаткичи тўрт баробар камайган.
Президент мамлакат тараққиёти янги босқичга кирганини таъкидлаб, келгуси ўн йиллик миллий юксалиш даври бўлишини билдирди.
Бу даврда инсон қадрини янада юксалтиришга қаратилган 7 та миллий дастур амалга оширилиши белгиланмоқда. Биринчи миллий дастур билим ва малакани мамлакат тараққиётининг асосий капиталига айлантиришга қаратилган.
Тиббиёт соҳасида профилактикага устувор аҳамият берилиб, саломатликни асраш моделига ўтиш режалаштирилган. Шунингдек, давлат тиббий суғуртаси мамлакатнинг барча хонадонларига татбиқ этилиши кўзда тутилмоқда.
Иқтисодий соҳада эса 2030 йилгача ялпи ички маҳсулот ҳажмини 300 миллиард долларга етказиш мақсади белгиланди.
Президент сув ва табиатга муносабатни тубдан ўзгартиришга қаратилган дастур ҳам амалга оширилишини маълум қилди. Фуқаролар ва тадбиркорларнинг қонуний кафолатларини кучайтириш бўйича ислоҳотлар ҳам давом эттирилади.
Шунингдек, маҳаллани жамият тараққиётининг асосий буюртмачисига айлантириш вазифаси белгиланди.
Ташқи сиёсат соҳасида Ўзбекистонни халқаро дипломатиянинг муҳим марказларидан бирига айлантириш мақсадида кўпқиррали, вазмин ва мувозанатли ташқи сиёсат давом эттирилиши таъкидланди.
Президент ўз нутқида мамлакат эришган натижалар билан бирга келгуси мақсадларга ҳам тўхталиб, халқ ва давлат ягона мақсад йўлида бирлашган ҳолда ҳаракат қилса, эришиб бўлмайдиган марра йўқлигини таъкидлади.
Шавкат Мирзиёев Ўзбекистон халқи ўз олдига қўйган улуғ мақсадларга албатта етишига ишонч билдирди.
