Ўзбекистон енгил саноатининг жаҳон бозоридаги мавқеини мустаҳкамлашни мақсад қилмоқда. Бу йўлда немис ҳамкорлари билан алоқаларни ривожлантиришга ҳам алоҳида эътибор қаратилмоқда. «Ўзтўқимачиликсаноат» уюшмаси ва Германиянинг Gesamtmasche ташкилоти GUZ Partners қўшма лойиҳасини амалга оширмоқда. Лойиҳа ўзбек тўқимачилик корхоналарининг халқаро таъминот занжирларидаги иштирокини кенгайтиришга қаратилган. Бу ҳақда ЎзА хабар берди.
Лойиҳа кейинги уч йилга мўлжалланган. Унинг асосий вазифалари янги бизнес алоқаларини ўрнатиш, ўзбек компанияларининг экспорт имкониятларини кенгайтириш ва маҳаллий тўқимачилик маҳсулотларининг рақобатбардошлигини оширишдан иборат.
Лойиҳанинг асосий йўналишларидан бири халқаро стандартлар асосида ишлай оладиган мутахассисларни тайёрлашдан иборат. Train-the-Trainer дастури доирасида соҳанинг 30 дан ортиқ вакили амалий семинарларда иштирок этди. Уларда матоларни бўяш ва пардозлаш технологиялари, шунингдек, экспорт салоҳиятини ривожлантириш масалалари муҳокама қилинди.
Иштирокчилар замонавий ишлаб чиқариш усуллари, технологик жараёнларни оптималлаштириш ёндашувлари ва маҳсулотларни хорижий бозорларда илгари суриш воситаларини ўргандилар.
Лойиҳанинг яна бир муҳим йўналиши ўзбек ишлаб чиқарувчиларини хорижий экспертлар ва салоҳиятли ҳамкорлар билан бевосита боғлашдир. TextileExpo Uzbekistan Spring 2026 кўргазмаси доирасида немис мутахассислари 20 дан ортиқ маҳаллий ишлаб чиқарувчи ва бренд вакиллари билан учрашдилар.
Учрашувларда маҳсулот сифати, экспорт географиясини кенгайтириш, барқарор ривожланиш ва ишлаб чиқариш самарадорлигини ошириш масалаларига эътибор қаратилди.
Лойиҳанинг яна бир йўналиши тўқимачилик таълими ва дизайн соҳасини ривожлантиришга қаратилган.
Тошкент тўқимачилик ва енгил саноат институтида мода ва дизайн соҳасидаги халқаро эксперт Роберт Херцог иштирокида дизайнерлар, ўқитувчилар, корхона мутахассислари ва талабалар учун беш кунлик халқаро ўқув семинари ўтказилди.
Иштирокчилар замонавий дизайн ечимлари бўйича тажриба алмашдилар ва жаҳон мода саноатидаги долзарб тенденцияларни муҳокама қилдилар.
Ўзбекистон учун енгил саноат экспортнинг асосий йўналишларидан бири ҳисобланади. Бугунги кунда енгил саноат мамлакат ташқи савдоси таркибида салмоқли ўрин эгалламоқда.
Ўзбекистон Инвестициялар, саноат ва савдо вазирлиги маълумотларига кўра, 2026 йилнинг биринчи ярмида енгил саноат маҳсулотлари экспорти 1,66 миллиард долларни ташкил этди. Бу мамлакат умумий экспортининг 11,5 фоизига тенг.
Энди вазифа нафақат ўзбек тўқимачилик маҳсулотларини хорижда кўпроқ сотиш, балки маҳаллий корхоналарни глобал ишлаб чиқариш ва савдо занжирларига янада чуқур интеграция қилишдан иборат.
Айнан шу нуқтада Германия билан ҳамкорлик ўзбек енгил саноати учун ўзига хос «трамплин» вазифасини бажариши мумкин. Бу анъанавий маҳсулот экспортидан халқаро таъминот занжирларида иштирок этишга ўтишни англатади. Бундай занжирларда ҳал қилувчи омиллар нафақат нарх, балки маҳсулот сифати, дизайн, технологиялар, халқаро стандартлар ва хорижий буюртмачилар талабларини барқарор равишда бажариш қобилияти ҳамдир.
В. Новиков
