Ўзбекистонда уй-жой сотиб олишда фирибгарлар тузоғига тушиб қолмаслик ва бинонинг қонунийлигини аниқлаш мақсадида dshk.shaffofqurilish.uz геопортали ишга туширилган. Қурилиш ва уй-жой коммунал хўжалиги вазирлиги тасарруфидаги ушбу тизим ноқонуний қурилишларни фош этиш ва шаҳарсозлик ҳужжатларини назорат қилиш имконини беради.
Порталнинг махсус реестрида қонунбузар объектларнинг манзили, майдони ва фотосуратлари жамланган. Энг муҳими, харитадаги рангли белгилар орқали бинонинг ҳолатини осонгина билиб олиш мумкин: кўк ранг — қурилиш қонуний давом этаётганини, қизил — ишлар тўхтатилганини, қора ранг эса қурилиш мутлақо бекор қилинганини англатади. Агар қурилаётган бино харитада умуман акс этмаган бўлса, демак у расмий рўйхатдан ўтмаган.
Шунингдек, тизим орқали бинонинг давлат назоратида эканлигини, яқин орада бузилиш (снос) ёки реновация режасига тушган-тушмаганини ҳам олдиндан аниқлаш имконияти мавжуд. Мутахассислар фуқароларга маблағ тикишдан аввал объектни ушбу база орқали албатта текширишни тавсия этмоқда.
