Экология ва иқлим ўзгариши миллий қўмитасининг ишчи гуруҳи Тошкент иссиқлик электр станциясининг куз-қиш мавсумига тайёргарлик ҳолатини ўрганди.
Ўрганиш давомида станциянинг асосий ускуналари техник ҳолати, иситиш мавсумида барқарор ва хавфсиз ишлашини таъминлаш чоралари кўриб чиқилди.
Шунингдек, фильтрларнинг техник ҳолати, улардан самарали фойдаланиш ва техник хизмат кўрсатиш ишлари таҳлил қилинди. Чанг-газ тозалаш тизимларини модернизация қилиш масаласига ҳам эътибор қаратилди.
Ишчи гуруҳ 9 ва 10-энергоблокларда янги фильтрлаш ускуналарини қуриш жараёни билан ҳам танишди.
Масъул мутахассисларга мавжуд тозалаш тизимларининг ишончли фаолиятини таъминлаш, ускуналарга ўз вақтида техник хизмат кўрсатиш ва уларни босқичма-босқич модернизация қилиш бўйича тавсиялар берилди.
Шунингдек, куз-қиш мавсумида юзага келиши мумкин бўлган экологик хавфларнинг олдини олиш ва атмосфера ҳавосига салбий таъсирни камайтириш чораларини кучайтириш зарурлиги таъкидланди.
