Тошкент шаҳрида Ички ишлар бош бошқармаси ходимлари шаҳар прокуратураси билан ҳамкорликда спа-салон ниқоби остида фаолият юритган жиноий гуруҳ фаолиятига чек қўйди. Тезкор тадбир «Хавфсиз ва соғлом юрт» ойлиги доирасида ўтказилди.
Тергов маълумотларига кўра, уч нафар гумонланувчи қизларни ишга жойлаштириш баҳонасида ёллаган. Тергов версиясига кўра, улар салон биносида ушлаб турилиб, мижозларга интим хизматлар кўрсатишга мажбурланган.
Жабрланувчилардан бирининг айтишича, у Telegram орқали официантлик иши ҳақидаги эълонга жавоб берган. Унинг сўзларига кўра, манзилга келгач, шахсий буюмлари олиб қўйилган, ертўлага туширилиб, массажчи сифатида ишлаши айтилган.
Жабрланувчи, шунингдек, мижозларга хизмат кўрсатишдан бош тортган қизлар калтаклангани, овқатдан маҳрум қилингани, жисмоний зўравонлик билан таҳдид қилингани ва бинодан чиқиб кетишига йўл қўйилмаганини маълум қилган.
Тезкор тадбир давомида ҳуқуқни муҳофаза қилувчи органлар яна етти нафар аёл массажчи ниқоби остида интим хизматлар кўрсатганини аниқлаган.
Гумонланувчилар интим хизматлар учун тўлов сифатида, тергов талқинига кўра, 320 АҚШ доллари ва 6 миллион 250 минг сўмни қабул қилаётган вақтда ушланган. Ҳодиса жойидан далилий ашёлар ҳам мусодара қилинган.
Мазкур ҳолат юзасидан Ўзбекистон Республикаси Жиноят кодексининг 135-моддаси иккинчи қисми («Одам савдоси») билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
