Жаҳон чемпионати–2026 чорак финалида Испания терма жамоаси Бельгия устидан 2:1 ҳисобида ғалаба қозониб, мусобақанинг ярим финалига чиқди.
АҚШнинг Инглвуд шаҳрида бўлиб ўтган учрашувда ҳисобни биринчи бўлимда испаниялик ярим ҳимоячи Фабиан Руис очди. Бироқ кўп ўтмай бельгиялик Шарль Де Кетеларе мувозанатни тиклаб, жамоасини ўйинга қайтарди.
Ғолиблик голи учрашувнинг 88-дақиқасида захирадан майдонга тушган Микель Мерино томонидан киритилди. У шу тариқа Испанияга иккинчи ўйин кетма-кет ҳал қилувчи голни тақдим этди. Аввалроқ Мерино Португалияга қарши баҳсда ҳам ягона гол муаллифи бўлган эди.
Ушбу ғалаба билан амалдаги Европа чемпионлари Жаҳон чемпионати ярим финали йўлланмасини қўлга киритди. Энди Испания финалга чиқиш учун Франция терма жамоаси билан куч синашади.
Мазкур ярим финал баҳси 14 июлдан 15 июлга ўтар кечаси бўлиб ўтиши режалаштирилган.
