Самарқанд ва Қашқадарё вилоятларида коррупция ҳолатлари аниқланди. Давлат хавфсизлик хизмати ходимлари Иқтисодий жиноятларга қарши курашиш департаменти билан ҳамкорликда тезкор тадбирлар ўтказиб, улар якунлари бўйича жиноят ишлари қўзғатилди.
Самарқанд вилоятида «Ургуттумангаз» газ таъминоти бўлими ходими собиқ ходим билан тил бириктириб, газ ускуналарини ўрнатиш учун лойиҳа ҳужжатларини расмийлаштириш ва техник шартларни олиш эвазига 2 минг АҚШ доллари талаб қилган. Гумонланувчилар пул маблағини олаётган вақтда ашёвий далиллар билан қўлга олинди.
Қашқадарё вилоятида эса Кадастр агентлигининг туман бўлимларидан бири раҳбари қўлга олинди. Тергов маълумотларига кўра, у иссиқхона қуриш учун мўлжалланган 50 сотих суғориладиган ер майдонига кадастр ҳужжатларини расмийлаштириш ва уни сотиб олишга ёрдам беришни ваъда қилиб, 11,6 минг АҚШ долларини олган.
Ҳуқуқни муҳофаза қилувчи органлар маълум қилишича, мансабдор шахс ўз ваъдасини бажармаган ва пулнинг бир қисми — 49,7 миллион сўмни қайтариш вақтида қўлга олинган. Терговга қадар текширув давомида у жабрланувчига қолган 89,5 миллион сўмни ҳам қайтарган.
Ҳар икки ҳолат бўйича жиноят ишлари қўзғатилди. Тергов ҳаракатлари давом этмоқда.
