“Тошкент” Республика фонд биржасида халқаро инвестиция компаниялари вакиллари иштирокида учрашув бўлиб ўтди. Тадбирда WOOD & Company бошчилигидаги делегация ҳамда жаҳон молия бозорининг нуфузли иштирокчилари қатнашди.
Учрашувда Morgan Stanley Investment Management, Lazard, Artisan Partners LP, Wexford Capital, Prospe Capital Management ва бошқа йирик инвестиция компаниялари вакиллари Ўзбекистон фонд бозорининг бугунги ҳолати ва ривожланиш истиқболлари билан танишди.
Мулоқот чоғида хорижий институционал инвесторлар иштирокини кенгайтириш, халқаро капитални жалб қилиш, валюта конвертацияси механизмлари ҳамда инвесторлар учун яратилаётган қулай шарт-шароитлар муҳокама қилинди.
Шунингдек, бозор инфратузилмасини янада такомиллаштириш, глобал кастодианлар билан ҳамкорликни ривожлантириш, рақамли трансформация жараёнларини жадаллаштириш ва шаффофлик даражасини ошириш масалаларига алоҳида эътибор қаратилди.
Томонлар Ўзбекистон фонд бозорининг инвестициявий жозибадорлигини кучайтириш ва халқаро инвесторлар билан ҳамкорликни янада кенгайтириш бўйича мулоқотларни давом эттиришга келишиб олди.
Мутахассислар фикрича, бундай учрашувлар мамлакат молия бозорининг халқаро майдондаги нуфузини мустаҳкамлаш, янги инвестиция оқимларини жалб этиш ва капитал бозорини глобал молиявий тизимга интеграция қилишда муҳим аҳамият касб этади.
