Ўзбекистон Президенти Америка Қўшма Штатлари Президенти Дональд Трампга таваллуд куни, юбилейи муносабати билан табрик мактуби йўллади.
Давлат раҳбари ўз табригида Дональд Трампни бой сиёсий тажрибага эга, ўз халқи орасида ҳурмат қозонган давлат арбоби сифатида таърифлаган. Шунингдек, унинг қатъий сиёсий етакчилиги ва мустаҳкам иродаси туфайли АҚШнинг халқаро майдондаги нуфузи ва қудрати тобора мустаҳкамланиб бораётгани қайд этилган.
Табрик мактубида Ўзбекистон ва АҚШ ўртасидаги муносабатларнинг бугунги ривожланиш суръатларига ҳам алоҳида эътибор қаратилган. Қайд этилишича, ўзаро ҳурмат, ишонч ва умумий манфаатларга асосланган ҳамкорлик сўнгги йилларда изчил ривожланиб, мазмунан янги босқичга кўтарилмоқда.
Президент Мирзиёев икки мамлакат ўртасидаги алоқалар ҳар қачонгидан ҳам мустаҳкам ва амалий тус олаётганини таъкидлаб, Ўзбекистон АҚШ билан кўп қиррали ва стратегик шериклик муносабатларини янада чуқурлаштиришдан манфаатдор эканини билдирган.
Хусусан, савдо-иқтисодий ва инвестициявий ҳамкорликни янги босқичга олиб чиқиш устувор вазифалардан бири сифатида қайд этилган. Шу билан бирга, Ўзбекистон раҳбари Дональд Трампнинг халқаро майдонда тинчлик ва барқарорликни таъминлашга қаратилган саъй-ҳаракатларини юқори баҳолаган.
Мактубда турли халқаро ва минтақавий платформалар доирасидаги кўп томонлама ҳамкорликни янада ривожлантириш ва уни янги амалий натижалар билан бойитиш муҳимлиги таъкидланган.
Стратегик шерикликнинг истиқболли йўналишларини муҳокама қилиш мақсадида Ўзбекистон Президенти америкалик ҳамкасбини мамлакатимизга илк тарихий ташриф билан келишга таклиф этган.
Табрик якунида Дональд Трампга мустаҳкам соғлиқ, оилавий бахт-саодат ва давлатчилик фаолиятида муваффақиятлар, Америка халқига эса тинчлик ва фаровонлик тилаклари билдирилган.
