Ўзбекистонда ёшларнинг тадбиркорлик ташаббусларини қўллаб-қувватлаш мақсадида «Ёшлар бизнеси» дастури доирасида янги имтиёзли кредитлар жорий этилди. Президент қарорига мувофиқ, 31 ёшгача бўлган фуқаролар 7 йилгача муддатга молиявий кўмак олиш имкониятига эга бўлади.
Белгиланган тартибга кўра, кредитлар «Алоқабанк» орқали ажратилади. Хусусан, таълим олиш ва касб-ҳунар ўрганиш учун 20 миллион сўмгача, SMM, мобилография, фриланс ва онлайн бизнес йўналишларидаги лойиҳалар учун 50 миллион сўмгача маблағ тақдим этилади.
Шунингдек, касаначилик, тикувчилик ва маҳсулотларни қайта ишлаш соҳасида фаолият бошлаш истагида бўлган ёшлар ҳам 50 миллион сўмгача имтиёзли кредит олишлари мумкин. Новвойчилик ва ширинлик маҳсулотлари ишлаб чиқариш лойиҳалари учун эса кредит миқдори 100 миллион сўмгача этиб белгиланган.
Кредитлар асосий қарз бўйича бир йилгача имтиёзли давр билан ажратилади. Мазкур чоралар ёшларнинг бандлигини таъминлаш, уларнинг бизнес ташаббусларини рағбатлантириш ҳамда янги иш ўринлари яратишга хизмат қилиши кутилмоқда.
