Жарқўрғон туманида ҳуқуқни муҳофаза қилувчи органлар ходимлари гиёҳванд модда сақловчи ўсимликларни ноқонуний етиштириш билан боғлиқ икки ҳолатни аниқлади. Маҳаллий аҳоли яшаш хонадонларидан 300 дан ортиқ туп опий кўкнори ва қарийб уч килограмм қуритилган хомашё мусодара қилинди.
ИИВ маълумотига кўра, 11 май куни ўтказилган махсус тадбир давомида туман ички ишлар бўлими ходимлари 66 ёшли аёлнинг хонадонни текширган. Аёлнинг томорқа ҳудудида 193 туп кўкнори ҳамда 2,9 килограмм қуритилган гиёҳванд ўсимлик аниқланган.
Шу куни ҳуқуқни муҳофаза қилувчи органлар яна бир шунга ўхшаш ҳолатни фош этди. Туманнинг 85 ёшли фуқароси яшовчи уйда 117 туп кўкнори топилди. Барча ўсимликлар белгиланган тартибда мусодара қилинган.
Ҳозирда ҳар икки ҳолат юзасидан терговга қадар текширув ҳаракатлари олиб борилмоқда.
Аввалроқ Олмазор туманида ҳам йирик опий кўкнори плантацияси йўқ қилинган эди. Пойтахт ИИББ, Давлат хавфсизлик хизмати ва прокуратура ходимлари ҳамкорлигида ўтказилган операция давомида хусусий уйлардан бири ҳудудида қарийб 260 туп гиёҳванд ўсимлик аниқланган.
