Қашқадарё вилоятида Ўзбекистон Фавқулодда вазиятлар вазирлиги ходими дарёга тушиб кетиб, чўка бошлаган тўққиз ёшли болани қутқариб қолди.
Ҳодиса 23 май куни соат 17:00 атрофида Китоб туманининг «Боғбон» маҳалласида содир бўлган. Дастлабки маълумотларга кўра, бола велосипедда ҳаракатланаётган вақтда мувозанатни йўқотиб, Қашқадарё дарёсига қулаб тушган.
Боланинг акаси атрофдагиларни ёрдамга чақирган. Унинг чақириқларини яқин атрофда яшовчи ФВВ ходими, майор Ҳусниддин Шарапов эшитиб, дарҳол сувга тушган.
Офицер болани тезкорлик билан дарёдан олиб чиқиб, унинг ҳаётини сақлаб қолишга муваффақ бўлган.
Мавжуд маълумотларга кўра, зарур тиббий ёрдам кўрсатилганидан сўнг боланинг аҳволи қониқарли деб баҳоланган ва у уйига жавоб берилган.
ФВВ маълум қилишича, майор Ҳусниддин Шарапов Китоб туманидаги қутқарув бўлинмаларидан бирида гуруҳ қўмондони лавозимида хизмат қилмоқда.
