Ўзбекистон Республикаси Президентининг қарори билан Президентнинг Жаҳон савдо ташкилоти бўйича вакили Азизбек Урунов ўриндошлик асосида Озиқ-овқат маҳсулотлари хавфсизлиги қўмитаси раиси лавозимига тайинланди.
Маълум қилинишича, мамлакатда озиқ-овқат хавфсизлиги тизимини такомиллаштириш мақсадида янги қўмита ташкил этилган бўлиб, унга раҳбарлик қилиш Азизбек Урунов зиммасига юклатилди. У айни вақтда Ўзбекистон Президентининг Жаҳон савдо ташкилоти бўйича вакили сифатидаги фаолиятини ҳам давом эттиради.
Шунингдек, қўмита раҳбариятида яна икки тайинлов амалга оширилди. Хусусан, Фурқат Жалилов Озиқ-овқат маҳсулотлари хавфсизлиги қўмитаси раиси ўринбосари лавозимига тайинланди. Шу муносабат билан у Президент Администрациясининг Ҳуқуқий экспертиза ва комплекс таҳлил қилиш департаменти бош инспектори лавозимидан озод этилди.
Элёр Талабоев эса қўмита раисининг комплаенс ва коррупцияга қарши ички назорат бўйича ўринбосари этиб тайинланди. У бунга қадар Президент Администрацияси раҳбари котибияти бош инспектори лавозимида ишлаб келган.
Очиқ манбалардаги маълумотларга кўра, Азизбек Урунов 2025 йилдан буён Ўзбекистоннинг Жаҳон савдо ташкилотига аъзо бўлиш жараёнлари бўйича асосий музокарачилардан бири сифатида фаолият юритиб келмоқда.
