2026 йил 5 май куни Тошкент шаҳрида румын вокал ансамбли Jazzappella чиқиш қилди — бу жамоа а капелла форматида жаз, поп-музыка ва фольклорни уйғунлаштирувчи лойиҳа ҳисобланади.
Концерт соат 19:00 да «Ўзбекистон» Халқаро анжуманлар саройи ортидаги очиқ майдонда (Ўзбекистон шоҳкўчаси, 80) бўлиб ўтди. Тадбир 2026 йил 28 апрелдан 13 майгача ўтказилаётган Халқаро жаз фестивали доирасида ташкил этилди. Фестиваль ташкилотчиси Ўзбекистон Республикаси Санъат ва маданиятни ривожлантириш жамғармаси бўлди. Тадбир Ўзбекистондаги Румыния элчихонаси ва Румыния маданият институти кўмагида ўтказилди.
Румыниянинг Ўзбекистондаги элчиси Кристиан Чобану Ўзбекистон Румыния учун Марказий Осиёдаги муҳим ҳамкор эканини таъкидлаб, Халқаро жаз фестивали турли давлатлар мусиқачилари ўртасида маданий алмашинув учун муҳим майдонга айланганини қайд этди. Унинг сўзларига кўра, маданият халқларни яқинлаштирувчи кўприк вазифасини бажаради.
2006 йилда Золтан Андраш томонидан ташкил этилган Jazzappella гуруҳи жаз стандартлари, муаллифлик композициялари ва машҳур асарларнинг оригинал аранжировкалари ижроси билан танилган. Жамоа таркибига Иоана Мирци, Ралука Стоика, Ралука Урсу, Золтан Андраш, Томи Вайсбух, Александр Грэджану, шунингдек, овоз режиссёри Николай Даниэль ва вокал перкуссия ижрочиси Паскарю Кодрин киради.
Концерт дастуридан классик жаз композициялари ҳамда замонавий интерпретациялар ўрин олди. Жумладан, «Almost Like Being in Love», «But Not For Me», «La vie en rose» ва якуний «Bohemian Rhapsody» асарлари ижро этилди.
Аввал ҳам Румыния Тошкент халқаро жаз фестивалида иштирок этган: 2023 йилда Ineffable гуруҳи, 2024 йилда эса мусиқачи Петре Ионуцеску чиқиш қилган.
