Россия ва Украина давом этаётган можаро фонида қисқа муддатли сулҳ жорий этилганини маълум қилди.
Россия Мудофаа вазирлиги маълумотига кўра, 8–9 май кунлари ўқ отишни тўхтатиш тўғрисидаги қарор президент Владимир Путин томонидан қабул қилинган ва Ғалаба куни муносабати билан белгиланган. Вазирлик Украина томони ҳам ушбу ташаббусни қўллаб-қувватлашига умид билдирган.
Шу билан бирга, Россия томони байрам тадбирларини бузишга уринишлар бўлса, жавоб зарбаси берилишини, жумладан Киев марказига эҳтимолий ракета ҳужумлари амалга оширилиши мумкинлигини таъкидлади.
Ўз навбатида, Украина президенти Владимир Зеленский сулҳ режимини аввалроқ — 6 май ярим тундан бошлаб жорий этганини маълум қилди. Унинг таъкидлашича, асосий устувор вазифа инсон ҳаётини сақлаб қолиш бўлиб, Киев Россия томонидан сулҳ шартлари бўйича расмий таклиф олмаган.
Ҳозирча сулҳга риоя қилиш механизмлари ва тафсилотлари ноаниқлигича қолмоқда.
