Россиянинг Магадан шаҳрида Наврўз байрами нишонланди, унда ўзбек анъаналари, маданияти ва миллий таомлари намойиш этилди.
Тадбирда ватандошлар, талабалар, миллий-маданий марказлар вакиллари, маҳаллий ҳокимият органлари ҳамда шаҳар аҳолиси иштирок этди. Байрам “Наврўзни улуғлаш — инсонни улуғлаш демакдир!” шиори остида ўтказилди.
Дастур доирасида меҳмонларга Ўзбекистоннинг маданий мероси, туризм ва иқтисодий салоҳияти ҳақида маълумот берилди, шунингдек миллий ҳунармандчилик намуналари ва маҳсулотлар намойиш этилди.
Байрам муҳитини Ўзбекистондан келган артистларнинг чиқишлари, саҳна кўринишлари, миллий либослар ва халқ амалий санъати буюмлари кўргазмаси янада бойитди. Меҳмонларга шунингдек ўзбек миллий таомлари — палов, сумалак ва сомса тортиқ қилинди.
Ташриф давомида ўзбек делегацияси вакиллари Магадан вилояти раҳбарияти билан учрашиб, ўзбек диаспораси билан ҳамкорлик ва келгусидаги истиқболли алоқалар масалаларини муҳокама қилди.
Ватандошлар учун давра суҳбати ҳам ташкил этилди, унда иштирокчиларга улуғ аждодлар ҳақида китоблар ва ўзбек тили дарсликлари топширилди. Тадбир ўзбек маданиятини тарғиб қилиш ва гуманитар алоқаларни мустаҳкамлаш учун муҳим майдон бўлиб хизмат қилди.
