Ўзбекистон Президенти Шавкат Мирзиёев пойтахтнинг Мирзо Улуғбек туманида жойлашган «Ўзбекистон овози» гастрономик кўчаси фаолияти билан танишди.
Кўча 2025 йил сентябрь ойида реконструкциядан сўнг фойдаланишга топширилган. Лойиҳа Россиянинг City Makers ва «Люди Архитектс» архитектура бюролари иштирокида амалга оширилгани давлат раҳбари матбуот хизматида маълум қилинди.
Гастрономик кўчанинг умумий узунлиги 2,1 километрни ташкил этади, лойиҳа қиймати эса тахминан 40 миллиард сўмга тенг. Бугунги кунда бу ерда 165 та савдо нуқтаси фаолият юритмоқда, шундан 89 та тадбиркорлик субъекти сутка давомида — 24/7 режимида ишлашга ўтган.
Қайд этилишича, 2025 йилда Тошкентда аллақачон 26 та кўча 24/7 форматида ишлай бошлаган. 2026 йилда яна 18 та шундай туристик ва гастрономик локацияларни ташкил этиш режалаштирилган.
Бундай ҳудудларни ривожлантириш шаҳарнинг туристик жозибадорлигини ошириш, кичик бизнесни қўллаб-қувватлаш ва янги иш ўринлари яратишга қаратилган.
