Президент Шавкат Мирзиёев ислоҳотлар самарадорлигини таҳлил қилиш ва Бухоро вилоятини ривожлантиришнинг устувор йўналишларини белгилашга бағишланган йиғилиш ўтказди.
Қайд этилдики, ҳудуд саноат, қишлоқ хўжалиги, хизматлар соҳаси ва туризмда катта салоҳиятга эга. Вилоятда аллақачон икки йирик нефть-газ кимё корхонаси фаолият юритмоқда, яна бири қурилмоқда. Шу билан бирга, умумий қуввати 4,5 гигаватт бўлган 10 та қуёш ва шамол электр станцияларини барпо этиш лойиҳалари амалга оширилмоқда.
2025 йил якунларига кўра, ялпи ҳудудий маҳсулот 7,2 фоизга ўсиб, 86,6 трлн сўмга етди. Саноат 7,1 фоизга, қишлоқ хўжалиги 4,3 фоизга, хизматлар соҳаси 14 фоизга ошди. Ишсизлик даражаси 4,7 фоизгача, камбағаллик эса 6 фоизгача пасайди.
2026 йил учун улкан мақсадлар белгиланган: ялпи ҳудудий маҳсулотни 102,1 трлн сўмга етказиш (9,1 фоиз ўсиш), саноатни 9,1 фоизга, қишлоқ хўжалигини 5,9 фоизга, хизматлар соҳасини 20,1 фоизга ошириш. Ишсизлик ва камбағаллик даражасини 2 фоизгача тушириш, 381 мингдан ортиқ аҳолини даромад билан таъминлаш режалаштирилган.
Бунинг учун манзилли чора-тадбирлар кўзда тутилган бўлиб, жумладан Бухоро ва Когон каби айрим туман ва шаҳарларни ишсизлик ва камбағалликдан холи ҳудудларга айлантириш режалаштирилмоқда.
Инвестицияларга алоҳида эътибор қаратилди: 2026 йилда 3,3 млрд доллар хорижий инвестицияларни жалб қилиш, экспортни 1,5 млрд долларга етказиш ва 9,2 млрд долларлик лойиҳаларни амалга ошириш режалаштирилган. Саноат соҳасида 2,2 млрд долларлик 61 та йирик лойиҳадан иборат портфель шакллантирилган бўлиб, бу 18 мингта янги иш ўрни яратиш имконини беради.
Асосий ташаббуслар қаторида Когон туманида йилига 80 мингтагача электромобил ва гибрид автомобиллар ишлаб чиқаришни йўлга қўйиш, нефть-кимё саноатини ривожлантириш, қурилиш материаллари ва минерал ўғитлар ишлаб чиқаришни кенгайтириш бор.
Қишлоқ хўжалигида замонавий технологиялар ҳисобига 100 минг гектар ерни айланмага киритиш, чорвачиликни ривожлантириш ва ўнлаб ихтисослашган лойиҳаларни амалга ошириш режалаштирилган. Шунингдек, ҳосилдорликни ошириш ва сувдан фойдаланиш тизимини яхшилаш белгиланган.
Хизматлар ва бандлик соҳасида савдо кўчалари, туристик ҳудудлар ташкил этиш ва маҳаллалар асосида лойиҳаларни амалга ошириш кўзда тутилган. Тадбиркорликни қўллаб-қувватлаш учун 7,5 трлн сўм ажратилади.
Ҳудуднинг туристик салоҳияти тўлиқ ишга солинмаётгани таъкидланди. 2026 йилда 9 миллионгача турист жалб қилиш, меҳмонхона инфратузилмасини кенгайтириш ва янги туристик объектлар, жумладан мавзули маҳаллалар ва туристик қишлоқлар ташкил этиш режалаштирилган.
Шунингдек, таълим соҳасидаги лойиҳалар, жумладан хорижий олийгоҳлар билан ҳамкорлик, дуал таълимни ривожлантириш ва туризм соҳаси учун кадрлар тайёрлаш масалалари муҳокама қилинди.
Устувор йўналишлар қаторида инфратузилмани ривожлантириш — йўллар, турар жой массивлари, муҳандислик тармоқлари ва ижтимоий объектлар қурилиши ҳам бор. Бу мақсадларга 2026 йилда 4,4 трлн сўмдан ортиқ маблағ йўналтирилиши режалаштирилган.
Йиғилиш якунларига кўра, давлат раҳбари барча ташаббусларни самарали амалга ошириш ва ҳудуд салоҳиятидан тўлиқ фойдаланиш бўйича топшириқлар берди.
