Транспорт вазирлиги поездлар кечиккан ҳолларда йўловчиларга пулли компенсациялар тўлаш механизмини ишлаб чиқмоқда. Бу ташаббус темирйўл ҳаракати жадвали бузилиши бўйича фуқаролар шикоятларининг кўпайиши билан боғлиқ.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси маълумотларига кўра, фақат 2025 йилнинг ўзида кечикишлар бўйича 51 та шикоят келиб тушган. Айниқса, Тошкент — Бухоро йўналишидаги «Шарқ» поездларининг мунтазам кечикиши қайд этилган бўлиб, кечикишлар 40–60 дақиқагача етган. Шунингдек, йўловчилар чипталарда келтирилган етиб келиш вақти ҳақида нотўғри маълумотлар берилганини ҳам билдиришган.
Ҳозирги вақтда компенсациялар фақат юқори тезликдаги «Afrosiyob» поездлари учун назарда тутилган. Йўловчилар, багаж ва юк-багаж ташишнинг янги қоидалари лойиҳаси эса компенсацияларни барча поездларга, жумладан оддий поездларга ҳам татбиқ этишни назарда тутади.
Қоплама миқдори кечикиш давомийлигига қараб белгиланади:
15–30 дақиқа — чипта нархининг 15 фоизи,
31–60 дақиқа — 25 фоиз,
61–120 дақиқа — 50 фоиз,
121 дақиқадан ортиқ — чиптанинг тўлиқ қиймати.
Кутилишича, ушбу янгилик темирйўл хизматлари сифатини оширади ва йўловчилар ҳуқуқларини ҳимоя қилишни кучайтиради.
