Тошкент вилояти Бўстонлиқ туманида “Чиноркент” тоғ ҳудудида йўналишни йўқотиб қўйган эркакни қутқариш бўйича операция муваффақиятли якунланди. ФВВ ходимларининг тезкор ҳаракатлари туфайли фуқаро қисқа вақт ичида топилиб, хавфсиз ҳудудга олиб чиқилди.
Ҳодиса ҳақида хабар 22 март куни “112” ягона тезкор хизмат рақамига келиб тушган. Эркак тоғларда адашиб қолганини ва мустақил равишда чиқа олмаётганини маълум қилган.
Воқеа жойига зудлик билан Тошкент вилояти Фавқулодда вазиятлар бошқармасининг қидирув-қутқарув отряди етиб борган. Ҳудудни кўздан кечириш жараёнида қутқарувчилар эркакнинг жойлашувини аниқлаб, уни қийин етиб бориладиган ҳудуддан хавфсиз тарзда туширишни ташкил этган.
Эвакуациядан сўнг қутқарилган шахснинг ҳолати тиббий ёрдамни талаб қилмаслиги аниқланиб, у уйига қайтишга муваффақ бўлган.
Аввалроқ шунга ўхшаш операция Сурхондарё вилоятида ҳам ўтказилган. Бойсун туманида қутқарувчилар уйига яқин ҳудудда баҳорий манзаралардан баҳраманд бўлаётган маҳаллий фуқарога ёрдам берган. У ўз эҳтиётсизлиги сабаб хавфли табиий тузоққа тушиб қолган.
