Тошкентда ҳуқуқни муҳофаза қилувчи органлар мамлакат ҳудудига ноқонуний олиб кирилган катта миқдордаги дори воситаларини аниқлади. Мусодара қилинган препаратларнинг умумий қиймати 763 млн сўмни ташкил қилди.
Тезкор тадбир «Toshkent-AERO» ихтисослаштирилган божхона комплекси контрабандага қарши кураш бўлинмаси ходимлари томонидан Иқтисодий жиноятларга қарши курашиш департаменти ҳамда Давлат хавфсизлик хизмати ходимлари билан ҳамкорликда ўтказилди.
Амалиёт давомида Юнусобод туманида фуқаро дори воситалари солинган чемоданни бошқа шахсга топшираётган пайтда тўхтатилди. Холиcлар иштирокида ўтказилган кўздан кечириш жараёнида чемодан ичида ҳужжатлари мавжуд бўлмаган 18 турдаги 6 490 дона дори воситалари аниқланди.
Кейинчалик препаратларни қабул қилувчи шахснинг уйи текширилганда, Ҳиндистонда ишлаб чиқарилган яна 107 дона дори воситаси топилди. Барча препаратлар мусодара қилиниб, ашёвий далил сифатида вақтинча сақлашга жойлаштирилди.
Жами амалиёт давомида ҳужжатлар ва сифат тасдиғи мавжуд бўлмаган 6 597 дона дори воситаси мусодара қилинди. Мазкур ҳолат юзасидан текширув олиб борилмоқда.
