Ўзбекистонда 2026 йилнинг дастлабки икки ойи давомида ҳуқуқни муҳофаза қилувчи органлар томонидан 8 та ноқонуний нарколаборатория аниқланиб, фаолияти тугатилди. Бу ҳақда Ўзбекистон Президенти Администрацияси ҳузуридаги Наркотик моддалар ва ўқотар қуролларни назорат қилиш агентлигининг расмий канали маълум қилди.
Ўтказилган тезкор-профилактик тадбирлар натижасида, шунингдек, 375 килограмм наркотик, психотроп ва кучли таъсир қилувчи моддаларнинг ноқонуний айланмага кириб кетишининг олди олинди.
Идора маълумотига кўра, мусодара қилинган наркотик моддалар орасида энг катта улушни қуйидагилар ташкил этган:
— гашиш — 146 кг (42 фоиз);
— марихуана — 113 кг (33 фоиз).
Қолган қисмини бошқа турдаги наркотик ва психотроп моддалар ташкил этган.
Бундан аввал Андижон вилоятида яширин нарколаборатория аниқланган бўлиб, у ердан синтетик наркотиклар ҳамда уларни ишлаб чиқариш учун хомашё мусодара қилинган. Уларнинг қиймати тахминан 1 миллион долларга баҳоланган.
Идорада таъкидланишича, мамлакатда наркотик моддаларни ишлаб чиқариш ва тарқатиш каналларини аниқлаш ҳамда бартараф этиш бўйича ишлар давом этмоқда.
