Адлия вазирлиги ташаббуси билан йўлларда ноқонуний пойгаларни ташкил этганлик ва уларда иштирок этганлик учун маъмурий ҳамда жиноий жавобгарликни назарда тутувчи қонун лойиҳаси ишлаб чиқилди.
Қайд этилишича, сўнгги вақтларда йўлларда ноқонуний тарзда ўтказилаётган пойгалар ҳаракат иштирокчилари хавфсизлигига жиддий таҳдид солиб, оғир йўл-транспорт ҳодисаларига, айрим ҳолларда инсон ўлимига сабаб бўлмоқда. Бу ҳолат аҳоли ва ҳайдовчилар томонидан билдирилаётган эътироз ва хавотирларни кучайтирган.
Шу муносабат билан ишлаб чиқилган қонун лойиҳаси ноқонуний пойгалар оқибатида юзага келаётган ҳуқуқбузарликларнинг олдини олишга қаратилган. Ҳужжат жорий йил 17 февраль куни манфаатдор вазирлик ва идораларга келишиш учун юборилган. Белгиланган тартибда келишув жараёнлари якунлангач, лойиҳа жамоатчилик муҳокамасига тақдим этилиши режалаштирилган.
