“GST Oil” МЧЖ мурожаати асосида “V.I.” МЧЖ томонидан “HYUNDAI CONSTRUCTION EQUIPMENT” компаниясига тегишли “HYUNDAI” товар белгисидан фойдаланган ҳолда икки дона махсус техника, экскаваторни республика ҳудудига олиб киришга уринилгани аниқланган. Ушбу техникалар божхона постида тўхтатиб қолинган.
Мазкур ҳолат юзасидан адлия органлари кўмагида “GST Oil” ва “V.I.” МЧЖ ўртасида медиатив келишувга эришилган. Келишув шартларига мувофиқ, “V.I.” МЧЖ ҳуқуқ эгасига 206 миллион сўм миқдорида товон пули тўлаш мажбуриятини олган.
Шунингдек, компания “HYUNDAI” брендини келгусида қўлламаслик, ушбу брендга оид техникаларни Ўзбекистон ҳудудига олиб кирмаслик бўйича мажбуриятни зиммасига олди. Бундан ташқари, “V.I.” МЧЖга тегишли YouTube, Instagram ва бошқа ижтимоий тармоқлардаги саҳифаларида жойлаштирилган “HD Hyundai Centre” ва “расмий дилер” деган ёзувларни ўзгартириш белгиланди.
