Ўзбекистон Президенти Шавкат Мирзиёев 9 февраль куни қишлоқ хўжалиги учун янги ерларни ўзлаштириш ва аграр илм-фанни ислоҳ қилиш бўйича таклифлар билан танишди. Бу ҳақда давлат раҳбарига тақдим этилган тақдимот давомида маълум қилинди.
Сўнгги беш йилда қишлоқ хўжалиги айланмасига 826,5 минг гектар ер киритилди. Шундан 409 минг гектари суғориладиган майдонлардан иборат. Яна 418 минг гектар ер ерости сувларидан фойдаланиш ва кам сув талаб қиладиган экинларни экиш ҳисобидан ўзлаштирилиб, экин майдонларини кенгайтириш ва ердан фойдаланиш самарадорлигини оширишга хизмат қилди.
2030 йилгача бўлган режалар доирасида 938 минг гектар яйловларнинг ҳолатини яхшилаш кўзда тутилган. 2026–2027 йилларда 620 минг гектар яйлов тикланади. Бу эса қарийб 1 миллион бош майда шохли чорва молини боқиш ва гўшт ҳамда жун ишлаб чиқаришни ошириш имконини беради.
Аграр илм-фанни ислоҳ қилиш масаласига алоҳида эътибор қаратилди. Таклифга кўра, 22 та илмий марказ, 260 та лаборатория ва 2,5 мингдан ортиқ олимни бирлаштирган ягона Қишлоқ хўжалиги фанлари академияси ташкил этилади. Устувор йўналишлар сифатида биотехнология, генетика, рақамли ва “ақлли” қишлоқ хўжалиги, дрон технологиялари, тупроқ саломатлиги, органик деҳқончилик ва озиқ-овқат хавфсизлиги белгиланди.
Кадрлар тайёрлаш масаласи ҳам муҳокама қилинди. Қайд этилишича, Тошкент давлат аграр университети битирувчиларининг атиги 55 фоизи мутахассислиги бўйича ишламоқда. Шу боис таълим, илм-фан ва ишлаб чиқариш интеграциясини кучайтириш, талабалар амалиётини агрокластерлар, корхоналар ва илмий институтларда кенгайтириш режалаштирилмоқда.
Шунингдек, Агросаноатни ривожлантириш агентлиги фаолияти ҳам кўриб чиқилди. 2025 йилда 44 минг гектар самарасиз ерларда интенсив боғ ва узумзорлар барпо этилди, натижада 37 мингта иш ўрни яратилди. 2027 йилдан бошлаб мазкур лойиҳалар ҳосил бера бошлаши ва йилига 660 миллион долларгача мева-сабзавот маҳсулотларини экспорт қилиш имконини яратиши кутилмоқда.
Муҳокама якунида давлат раҳбари тегишли идораларга белгиланган чора-тадбирларни амалга ошириш бўйича топшириқлар берди.
