Тиббий жиҳозларнинг клиник тадқиқотларини ўтказиш тартибини белгилайдиган низом 2026-йил 26 февраль куни кучга киради.
Низомга мувофиқ, айрим турдаги тиббий жиҳозлар клиник тадқиқотлар ўтказилмасдан олдин давлат рўйхатидан ўтказилади. Жумладан, хавфсизлик классификацияси бўйича I синфга мансуб тиббий жиҳозлар, Жаҳон соғлиқни сақлаш ташкилоти томонидан қайта малакаланган (prequalification) ҳамда ушбу ташкилот билан ҳамкорликда рўйхатдан ўтказиладиган “in vitro” ташхис тиббий жиҳозлари, шунингдек, Ўзбекистон Республикаси ҳудудида клиник тадқиқотлари илгари ўтказилган тиббий жиҳозлар киради.
Клиник тадқиқотларни ўтказиш тўғрисидаги қарор Марказ тавсияси асосида Ўзбекистон Республикаси Соғлиқни сақлаш вазирлиги ҳузурида ташкил этилган Экспертлар кенгаши томонидан қабул қилинади.
Белгиланган тартибга кўра, клиник тадқиқотлар тиббий жиҳознинг хавфсизлик даражасидан келиб чиқиб, камида 20 нафар клиник тадқиқот субъекти жалб этилган ҳолда амалга оширилади.
