Ўзбекистонда божхона маъмурчилигини оптималлаштириш доирасида бир қатор чегара ва божхона постлари фаолияти якунланиши белгиланмоқда. Хусусан, «Боботоғ», «Учқўрғон», «Поп», «Ровот», «Риштон» ҳамда «Бекобод авто» божхона постлари тугатилади.
Жорий йилдан ушбу пунктларда автотранспорт воситаларини кўздан кечириш ишлари синов тариқасида фақат чегара қўшинлари томонидан амалга оширилади. Бу орқали назорат жараёнларини соддалаштириш ва такрорланувчи функцияларни қисқартириш мақсад қилинган.
Шу билан бирга, Масофавий электрон декларациялаш (МЭД) тизими ҳам қайта ташкил этилади. Андижон, Бухоро, Наманган, Самарқанд, Тошкент ва Фарғона вилоятларида жойлашган МЭД постлари фаолияти тўхтатилади.
Маълум қилинишича, тугатилаётган божхона постларидаги штат бирликлари «Божхона расмийлаштируви маркази» ҳамда иш ҳажми юқори бўлган бошқа божхона постларига ўтказилади. Бу қарор кадрлар салоҳиятидан самарали фойдаланиш ва божхона расмийлаштируви жараёнларини марказлаштиришга қаратилган.
