Самарқанд вилоятида шифокорлар бемор танасидан тахминан 200 грамм миқдорда михлар ва ўз-ўзидан бурғилаб кирувчи винтларни олиб чиқишди. Бу ҳақда Республика шошилинч тиббий ёрдам илмий марказининг вилоят филиали матбуот хизмати хабар берди.
Тиббиёт муассасасига қорин соҳасида кучли оғриқлардан шикоят қилган 29 ёшли эркак олиб келинган. Ташхис жараёнида беморнинг ошқозон-ичак йўлида кўп миқдорда металл буюмлар мавжудлиги аниқланди.
Беморга шошилинч тартибда лапаротомия ва гастростомия усулларида жарроҳлик амалиёти ўтказилди. Қорин бўшлиғидан тахминан 200 грамм металл буюмлар олиб чиқилди. Операция тахминан бир соат давом этганини олий тоифали шифокор Юлдош Қулиев маълум қилди.
Қайд этилишича, бемор кучли стресс ҳолатида бўлган ва ўз ҳаракатларини назорат қила олмаган ҳолда металл буюмларни ютиб юборган. Айни пайтда унинг аҳволи қониқарли деб баҳоланмоқда.
