Ижтимоий тармоқларда кечаси баланд қаватли бинонинг зинапоясида пичоқ ушлаб юрган ва квартира эшикларини тақиллатаётган эркакни кўрсатадиган видео тарқалмоқда. Ҳодиса 5-январ куни соат 1:35 да Тошкент шаҳрининг Яшнабод туманидаги биноларнинг биридан содир бўлган.
Пойтахт ИИБ матбуот хизматига кўра, 41 ёшли фуқаро маст ҳолда бўлиб, жамоат тартибини ва фуқароларнинг осойишталигини бузган. Унинг ёнида совуқ қурол сифатида ишлатилиши мумкин бўлган пичоқ бўлган.
Ҳуқуқни муҳофаза қилувчи орган ходимлари эркакни тезда қўлга олишди. Унга нисбатан Маъмурий жавобгарлик кодексининг 183-моддаси (майда безорилик), 185-2-моддаси (совуқ қурол ёки совуқ қурол сифатида ишлатилиши мумкин бўлган буюмларни олиб юриш) ва 194-моддаси (ҳуқуқни муҳофаза қилувчи орган ходимларининг қонуний талабларига бўйсунмаслик) бўйича маъмурий баённомалар тузилди.
