Болгария Янги йилни евро жорий этиш билан бошлади ва шу тариқа ягона Европа валютасини қабул қилган 21-давлатга айланди. Мамлакат қарийб 20 йил аввал Европа Иттифоқига аъзо бўлганидан сўнг, миллий валютаси лев муомаладан чиқарилди.
Ярим тунда София шаҳридаги Марказий банк биносида болгар евротангаларининг тасвирлари намойиш этилди. Шу пайтдан эътиборан лев ўрнини расман евро эгаллади. Лев Болгария тарихида асрлар давомида мавжуд бўлган рамзий валюта ҳисобланар эди.
Европа Марказий банки президенти Кристин Лагард Болгариянинг евроҳудудга қўшилишини олқишлаб, еврoни умумий қадриятлар ва жамоавий куч рамзи сифатида баҳолади. 6,4 миллион аҳолига эга Болгарияда ҳукуматлар кетма-кет евро жорий этишни иқтисодиётни рағбатлантириш, Ғарб билан интеграцияни мустаҳкамлаш ва ташқи таъсирлардан ҳимоя сифатида кўриб келган. Бироқ жамиятда бу қарорга нисбатан икки хил муносабат сақланиб қолмоқда.
Президент Румен Радев еврони Европа Иттифоқига тўлиқ интеграциянинг якунловчи босқичи деб атади. Шу билан бирга, у ушбу масала бўйича референдум ўтказилмаганини танқид қилди ва бу ҳолат сиёсий элита билан жамият ўртасидаги чуқур бўлинишни акс эттиришини таъкидлади.
Сўнгги ойларда мамлакатда сиёсий беқарорлик кучайган. Коррупцияга қарши намойишлар декабрь ўрталарида ҳукуматнинг истеъфосига олиб келди. Болгария сўнгги беш йил ичида саккизинчи сайлов арафасида турибди.
Еврoга ўтиш жараёнида бозорларда нархлар лев ва еврода параллел кўрсатилмоқда. Айрим фуқаролар Европа мамлакатлари бу валюта билан яшаб келаётганини, Болгария ҳам мослашишини таъкидламоқда. Бироқ аҳолининг салмоқли қисми инфляция хавфидан хавотирда.
Болгария евротангаларининг дизайни миллий рамзларга асосланган. Жумладан, VIII асрга оид Мадара отлиғи тасвири 1 центдан 50 центгача бўлган тангаларда акс этган. Ушбу тарихий ёдгорлик ЮНЕСКОнинг жаҳон мероси рўйхатига киритилган.
Шу тариқа, Болгария еврo жорий этиш орқали Европа иқтисодий маконига янада яқинлашди, бироқ бу қарор атрофидаги ижтимоий ва иқтисодий баҳслар ҳали узоқ вақт давом этиши кутилмоқда.
