Янгиҳаёт туманида ҳаракатланиб кетаётган Nexia-3 устига дарахт қулаб тушди. Оқибатда 26 ёшли йўловчи қиз бош мия очиқ жароҳати билан вафот этди. Экология бўлими дарахт соғлом бўлгани, ёмғир сабабли таги бўшаб қолганини билдирди.
12 ноябрь куни Тошкент вилояти Янгиҳаёт туманида ҳаракатланиб кетаётган Nexia-3 машинаси устига дарахт қулаб тушди. Бу ҳақда Millar кўрсатувидаги лавҳада маълум қилинди.
Ҳодиса оқибатида машинанинг орқа ўриндиғида бўлган, 1997 йилда туғилган йўловчи (аёл) шифохонада реанимацион чоралар кўрилганига қарамай, вафот этган. Унга бош мия очиқ жароҳати ташхиси қўйилган. Ҳайдовчи шок ҳолатига тушиб қолгани қўшимча қилинган.
Туман экология бўлими машина устига йиқилган дарахт 40−45 йиллик экани, яқинда ёғиб ўтган ёмғирлар сабабли унинг таги бўшаб қолгани ва шу сабабли илдиз қисми билан қулаб тушганини билдирди.
