Мамлакатмизда тўсиқсиз туризм инфратузилмасини ривожлантириш ва қулай шарт-шароит яратиш мақсадида Туризм қўмитаси томонидан тизимли ишлар амалга оширилмоқда.
Бунда асосий эътибор саёҳатни ногиронлиги бўлган шахслар учун қулайлаштириш, пандус, лифт ва овозли маълумотномаларни ўрнатиш, имтиёз ва чегирмалар тизимини яратишга қаратилган бўлиб, бугунги кунда жаҳон тажрибаси ўрганилмоқда.
Бугун, 27 октябрь куни Қўмитанинг Ички ва зиёрат туризмни ривожлантириш ҳамда барқарор туризмни ривожлантириш бошқармаси ҳамда халқаро “Globe4all” ташкилоти ўртасида онлайн мулоқот ўтказилди.
Мулоқот жараёнида Ўзбекистонда инклюзив туризмни ривожлантириш, бунда саёҳатга чиққан ногиронлиги бўлган шахслар барча туризм масканлари, жумладан, маданий мерос объектлари ҳақида барча маълумотларга эга бўлишлари муҳим эканлиги қайд этилди.
Ҳамкорликнинг дастлабки қадами сифатида 2024 йилда тўсиқсиз туризмни ривожлантириш учун халқаро “Globe4all” ташкилоти, қўмита ва унинг тизимидаги барча ташкилотлар ҳамда туроператорлар билан ҳамкорликда саёҳат дастурлари ишлаб чиқиш бўйича келишувга эришилди.
