Санъат арбоби Жўра Маҳмудов 80 ёшида вафот этди
Ўзбекистонда хизмат кўрсатган санъат арбоби, профессор, театр режиссори, педагог Жўра Маҳмудов оламдан ўтди — дея хабар қилди Маданият вазирлиги матбуот хизмати.
Жўра Маҳмудов фаолияти давомида «Она»,«Қиёмат қарз», «Инсонликка номзод», «Оғриқ тишлар», «Сохта оқсуяк», «Қаердасан, жон болам», «Қирол Лир» ва бошқа спектаклларни саҳналаштирган. Ҳар бир спектаклни бадиий-ғоявий юксаклиги, таъсир кучини оширишда тасвирий, мусиқий, техник воситалардан унумли фойдаланган.
Қолаверса, Жўра Маҳмудов «Адолат куни», «Овсинлар», «Садоқат» каби саҳна асарлари, «Осмондан танга ёққан кун», «Томчи», «Алпомиш», «Иккивой ва Бешвой» каби кичик томошабинларга бағишланган эртак-пьесаларнинг ҳам муаллифи ҳисобланади.
У 1983—1994 йиллар Сирдарё театрларида бош режиссёр, 1994—1997 йиллар Маданият ишлари вазирлигида етакчи мутахассис, 1997— 2002 йиллар Ёш томошабинлар театрида режиссёр сифатида фаолият юритган.
