Нуфузли Futsalplanet.com сайти томонидан мунтазам равишда йилнинг энг яхшилари аниқлаб келинади. Бу галги “Futsalplanet Awards” тантанали тақдирлаш маросими олдидан турли номинацияларда 2021 йилнинг кучли ўнликлари орасида Ўзбекистон футзалчилари ҳам эълон қилинди.
Дунёнинг энг яхши футзал жамоаси номи учун кучли ўнликда Ўзбекистон миллий терма жамоаси ҳам қайд этилган. Футзалчиларимиз билан бирга ушбу рўйхатдан Аргентина, Босния-Герцоговина, Эрон, Япония, Қозоғистон, Марокаш, Португалия, Словакия ва Венесуэла терма жамоалари жой олишган.
Йилнинг энг яхши терма жамоа мураббийи номинациясида эса Ўзбекистон терма жамоаси бош мураббийи Баҳодир Аҳмедов кучли ўнликка киритилган. Жаҳон чемпионатида ёрқин ва иродали ўйинлар кўрсатган футзалчиларимиз ва мураббийлар штаби шаънига бу яна бир муносиб эътироф бўлганини таъкидлаш керак.
