Ўзбекистон инновацион соғлиқни сақлаш Палатасида AstraZeneca компанияси билан қатор йўналишларда ҳамкорлик қилиш имкониятларини ўрганиш бўйича музокаралар ўтказилди. Бу ҳақда Палата матбуот хизмати маълум қилди.
Музокаралар давомида тиббиёт соҳасидаги олиб борилаётган ислоҳотлар натижасида Ўзбекистонда ҳам юқори технологиялардан фойдаланган ҳолда тайёрланган замонавий фармацевтик маҳсулотлар пайдо бўлиши ҳақида сўз борди.
Шунингдек, аҳолининг эҳтиёжга муҳтож қисмини фармацевтика маҳсулотлари билан имтиёзли таъминлаш, хусусан, стендлаш муолажасидан кейинги беморларга тромб ҳосил бўлишининг олдини олиш мақсадида антиагрегат терапиясини ўтказиш борасида ҳамкорлик лойиҳалари, мамлакатимизда мажбурий тиббий суғурта тизимини жорий этиш бўйича соғлиқни сақлаш тизими ходимларининг малакасини ошириш бўйича тажриба алмашиш масалалари муҳокама этилди.
