Қуёшда энг катта магнитудали чақнаш содир бўлди ва кучли магнит бўронлари кутилмоқда. Бу ҳақда Коинот тадқиқотлари институти ва Россия Фанлар академиясининг Қуёш-ер физикаси институти қуёш астрономияси лабораторияси маълум қилди.
“Қуёшда энг юқори Х даражали чақнаш икки кун ичида иккинчисидир. Кун охиригача ўта кучли ҳодисаларнинг жуда юқори хавфи бор», — дейилади лаборатория баёнотида. Шунингдек, улар юлдузда юқори фаоллик қайд этилаётганига, сўнгги 24 соат ичида 20 дан ортиқ чақнаш содир бўлганига аниқлик киритишди.
Узлуксиз магнит бўронлари ва геомагнит бузилишлар икки кун – 7 майгача давом этади.
Самарқанд халқаро технология университети ўз анъаналарига содиқ қолган ҳолда Муҳаммад Юсуф хотирасига бағишланган маънавий-маърифий тадбирни юқори савияда, 16 та давлатдан келган олимлар иштирогида ўтказди.
Ўзбекистон халқ шоири Муҳаммад Юсуф таваллудининг 70 йиллиги мамлакатимизда кенг нишонланди. Куни кеча Самарқанд халқаро технология университети (SIUT)да эл суйган шоирнинг юбилейи катта тантана билан қайд этилди. “Қўшиқ бўлиб қайтаман…” деб номланган маънавий-маърифий тадбир Silk Road Samarkand туристик марказининг “Hilton Samarkand Regency” меҳмонхонасида университетнинг Ўзбек тили ва маданияти маркази томонидан ташкил этилди.
Ҳар қандай тадбир, айниқса маънавий-маърифий тадбирлар университет ректори, профессор Юсуф Абдуллаев раҳнамолигида катта тайёргарлик билан кенг жамоатчилик вакиллари иштирогида ўтади. Бу анъанага айланган. Ушбу тадбирда ҳам университетнинг хорижий ва маҳаллий профессор-ўқитувчилари ва талабаларидан ташқари, шоирнинг рафиқаси Назира ас-Салом ҳамда Ўзбекистон ёзувчилар ва журналистлар уюшмалари Самарқанд вилоят бўлими ходимлари, адабиётшунослар ва шоирнинг мухлислари иштирок этдилар.
Тадбирда сўзга чиққан Ўзбекистонда хизмат кўрсатган маданият ходими, шоира, SIUT профессори Хосият Бобомуродова ҳамда Ёзувчилар уюшмаси вилоят бўлими бош мутахассиси Зуҳрабегим Муҳаммад Юсуф ижоди хусусида батафсил сўз юритишди.
Муҳаммад Юсуф Ватаннинг оташин куйчиси, муҳаббат ва инсонийликни, халқимизнинг маданият ва урф-одатларини, бойлигию-борлигини тараннум этувчи ҳақиқий халқ шоири эканлиги таъкидланди. Шоир қисқа вақт ичида ўз ижоди билан одамлар эътиборини торта олганлиги, улар унинг ижодидан завқ олганликлари қайд этилди. Унинг аксарият шеърлари қўшиқ бўлиб, таниқли хонандалар томонидан ижро этилмоқда.
Адибнинг умр йўлдоши Назира ас-Салом сўзга чиқиб, шоир билан ўтказган умр йўллари ва ёзган шеърлари тарихи ҳақида сўзлаб берди. “Самарқанд вилоятининг шаҳар ва туманларида Муҳаммад Юсуфнинг 70 йиллигига бағишлаб кўплаб тадбирлар ўтказимоқда. Буни халқимизнинг шоирга бўлган чексиз ҳурмати намунаси деб биламан. Бундай эътибор ва эътироф учун барчага миннатдорлик билдираман”, – дейди Назира ас-Салом.
Маънавий-маърифий тадбирда истеъдодли хонанда, SIUT Маънавият ва маърифат бўлими бошлиғи Зулфия Рашидова шоир шеърлари асосида яратилган қўшиқларни маҳороат билан ижро этди. Шунингдек, йиғилганлар эътиборига “Олтин Мерос” талабалар театр студияси тайёрлаган миллий рақслар, куй ва қўшиқлар ҳавола этилди.
Муҳаммад Юсуфнинг бетакрор ижоди ҳақида SIUT ректори, профессор Юсуф Абдуллаев ҳам алоҳида тўхталди. “Шоир қолдирган шеърий меъроси – бебаҳо ва ўлмас, – дейди ректор Юсуф Абдуллаев, – ҳар бир шеъри то ҳанузгача ёшларимизни тўлқинлантириб, ҳаётий ўрнак бўлиб келмоқда”.
Маънавий-маърифий тадбир “Улуғимсан Ватаним” қўшиғи билан якунланди.
Сўзнинг бадиий имкониятларидан маҳорат билан фойдаланган шоирнинг асарлари аждодлардан авлодларга мерос бўлиб, яна кўп йиллар одамларга завқ-шавқ бағишлайди.
Тошкент шаҳри Олмазор туманида жойлашган “Ғалаба боғи” ёдгорлик мажмуаси ҳамда унинг таркибидаги “Шон-шараф” давлат музейи ҳудудида 9 май — Хотира ва қадрлаш куни тадбирларига тайёргарлик кўриш муносабати билан хўжалик ва дезинфекция ишлари олиб борилмоқда.
Шу муносабат билан жорий йилнинг 6-7 май кунлари “Ғалаба боғи” ёдгорлик мажмуаси ҳудудига ташриф буюрувчиларнинг кириши вақтинчалик тўхтатилади.
Душанбеда Ўзбекистон-Тожикистон қўшма демаркация комиссияси ишчи гуруҳларининг навбатдаги йиғилиши бўлиб ўтди.
Унда чегараларни демаркация қилиш ишлари муҳокама қилинди ва Ўзбекистон-Тожикистон чегарасининг лойиҳа демаркация чизиғи бўйича ўзаро келишилган таклифлар тайёрланди.
Ўзбекистон давлат ташкилотлари ходимлари Малайзия техник ҳамкорлик дастури (MTCP) доирасида Куала-Лумпур шаҳрида ташкил этилган махсус ўқув курсини муваффақиятли тамомлади.
22-30 апрель кунлари бўлиб ўтган ўқувлар Малайзия Ташқи ишлар вазирлиги ҳузуридаги Дипломатия ва ташқи алоқалар институти томонидан илк бор Марказий Осиё давлатлари вакиллари учун ташкил қилинди.
Унда Ўзбекистон, Қозоғистон, Қирғизистон, Тожикистон ва Туркманистон давлатларидан вакиллар қатнашди.
Ўқув машғулотлари иқтисодий дипломатия, халқаро муносабатлар, икки ва кўп томонлама ҳамкорлик, халқаро музокаралар, инқирозларни бошқариш, ижодий иқтисодиёт каби мавзуларни қамраб олди.
Тадбирлар доирасида Ўзбекистонда барча жабҳаларда амалга оширилаётган кенг кўламли ислоҳотлар, «Ўзбекистон – 2030» стратегиясининг мазмун-моҳияти, мамлакатнинг инвестициявий ва туризм салоҳияти бўйича тақдимотлар ўтказилди.
Мазкур курс жорий йилдаги республика вакиллари учун Малайзияда ташкил этилган илк ўқув дастуридир. Бугунги кунга қадар MTCP курсларида 816 нафар ўзбекистонлик мутахассислар малака оширган.
Малайзия техник ҳамкорлик дастури ривожланаётган ҳамкор мамлакатларда инсон капиталини ривожлантириш мақсадида 1980 йилда ташкил этилган. Дастур Малайзия ТИВ тасарруфида фаолият юритади. Техник кўмак доирасида давлат идоралари ва олий таълим муассасалари вакиллари учун турли йўналишларда ўқув ва малака ошириш курслари ташкил этилади.
Дипломатия ва ташқи алоқалар институти 1991 йилда ташкил топган. Институтнинг асосий вазифаси Малайзия дипломатлари, халқаро ва маҳаллий мутахассислар учун дипломатиянинг турли йўналишлари бўйича малакасини оширишдан иборат.
Ўзбекистон ташқи ишлар вазири Бахтиёр Саидов кеча БМТ Европа иқтисодий комиссияси (ЕИК) Ижрочи котиби Татяна Молчан билан учрашди.
«БМТ Европа иқтисодий комиссиясининг (ЕИК) Ижрочи котиби Татяна Молчан хоним билан учрашишдан мамнунмиз, — деб ёзди Ўзбекистон ТИВ раҳбари ўзининг telegram каналида. — БМТ билан биргаликда миллий ва минтақавий лойиҳаларни амалга ошириш масалаларини батафсил муҳокама қилдик. Ўзбекистоннинг барча соҳаларда Барқарор ривожланиш мақсадларига эришишга қаратилган саъй-ҳаракатларини доимий қўллаб-қувватлаб келаётгани учун БМТ ЕИКга ўз миннатдорлигимизни билдирамиз».
Эслатиб ўтамиз, ЕИК раҳбари 2-3 май кунлари бўлиб ўтаётган учинчи Тошкент халқаро инвестиция форумида иштирок этиш учун мамлакатимизга келган эди.
Ўзбекистон Республикаси Президентининг «Ўзбекистон — 2030» стратегиясини «Ёшлар ва бизнесни қўллаб-қувватлаш йили»да амалга оширишга оид давлат дастури тўғрисида» 2024 йил 21 февралдаги ПФ-37-сон Фармонига мувофиқ электромобилларни қувватлантириш станцияларини ўрнатиш ва тармоққа улаш тартиб-таомилларини соддалаштирилди.
Бунда юридик шахслар томонидан электромобилларни қувватлантириш станцияларини ўрнатиш ва тармоққа улаш учун рухсат олиш жараёнлари соддалаштирилган ҳолда, 1 ойдан кўп бўлмаган муддатда амалга оширилади.
Энергетика вазирлигининг буйруғига мувофиқ «Ҳудудий электр тармоқлари» АЖ ва «Ўзэнергоинспекция» қувватлантириш станцияларини тармоққа улаш учун рухсат олиш жараёнларини белгиланган муддатларда келишиб берилишини таъминлайди.
Аҳолини энергия ресурслари билан таъминлаш ва атроф-муҳитни ҳимоя қилишга хизмат қилувчи мазкур турдаги фаолиятлар Энергетика вазирлиги томонидан қўллаб-қувватланиб келмоқда.
Россиянинг Киров шаҳри полицияси Ўзбекистонда одам савдосида гумонланаётган 21 ёшли мигрантни қўлга олди. Бу ҳақда Россия Ички ишлар вазирлигига таяниб “Lenta” хабар берди.
Ҳуқуқ-тартибот идоралари вакилларига кўра, эркак давлатлараро қидирувда бўлган. Россия ҳудудида у Ўзбекистон тергов органларидан яшириниб юрган. У қизни сотгани учун қидирувда бўлганини полицияга тан олган.
Қайд қилинишича, Бухорода унга нисбатан Ўзбекистон Жиноят кодексининг 135-моддаси («Одам савдоси») билан сиртдан қамоққа олиш тарзидаги эҳтиёт чораси қўлланилган.
“Қул савдогарининг Ўзбекистонга экстрадиция қилиш масаласи кўриб чиқилмоқда”,–дейилади хабарда.
Тошкент халқаро инвестиция форуми доирасида транспорт вазири ўринбосари Жасурбек Чориев Тошкент—Андижон пулли йўлини яратиш ишлари якунига етиб қолганини маълум қилди. Бу ҳақда Инвестициялар, саноат ва савдо вазирлиги хабар берди.
Июнь ойи охиригача биз техник-иқтисодий ишларни тугатамиз. Янги пулли йўл Тошкент ва бошқа ҳудудларни Фарғона водийси билан боғлашга ёрдам беради. Лойиҳанинг умумий узунлиги 314 километр бўлиб, унинг қиймати 4,65 миллиард долларни ташкил қилади, — дейди Жасурбек Чориев.
Бундан ташқари, вазир ўринбосари узоқ йиллардан бери асосий мақсадлардан бирига айланган трансафғон темирйўли ҳақида ҳам маълумот берган. Таъкидланишича, лойиҳа учта давлатни бир-бирига боғлашга ёрдам беради — Ўзбекистон, Афғонистон ва Покистон. Темирйўл Евросиё транспорт йўлагини яратишда муҳим рол ўйнайди. Натижада Марказий Осиё мамлакатлари Ҳинд океани портига чиқиш имконига эга бўлади. Темирйўл товарлар етказиб бериш муддатини 35 кундан 5 кунгача қисқартиради. Товарларни етказиб бериш нархи эса камида 40 фоизга пасаяди. Лойиҳа 2027 йил охиригача якунланиши кутилмоқда.
Яна бир муҳим лойиҳа бу, албатта, Хитой—Қирғизистон—Ўзбекистон темирйўли қурилишидир. Бу нафақат Ўзбекистон, балки бутун Марказий Осиё ривожланишида катта рол ўйновчи темирйўл бўлади. Лойиҳанинг асосий келишувлари аллақачон ҳал қилинган бўлиб, унинг қиймати тахминан 5,1 миллиард долларни ташкил қилса, узунлиги ҳозиргача 454 километр бўлиши кутилмоқда.
Ижтимоий тармоқларда 1 майдан бошлаб камералар яна бир қоидабузарликни қайд қилишни бошлаши ҳақида хабарлар тарқалди.
Ҳолатга Тошкент шаҳар ИИББ ЙҲХБ ахборот хизмати муносабат билдирди.
«Айрим ижтимоий тармоқ фойдаланувчилари томонидан асослантирилмаган, яъни транспорт воситаси ҳайдовчиси ҳаракат давомида ОГОҲЛАНТИРУВЧИ ИШОРАЛАРИНИ ёқмасдан манёврни (ўнга ёки чапга қайрилса) амалга оширса камералар томонидан қоидабузарлик сифатида қайд этилиб жаримага сабаб бўлиши мумкинлиги тўғрисидаги, аниқлик киритилмаган маълумотларни турли изоҳлар билан омма эътиборига тарқатмасликларини сўраймиз.
Шавкат Мирзиёев 3 май куни Тошкент халқаро инвестиция форуми ва Хорижий инвесторлар кенгаши мажлиси доирасида Европанинг бир қатор етакчи компаниялари раҳбарлари билан учрашув ўтказди.
Учрашувда “Suez” компанияси раиси ва бош директори Сабрина Суссан, “Arsenale Group” компанияси бош директори Паоло Барлетта, “Airbus” корпорациясининг Европа бўйича президенти Йохан Пелисье ҳамда “Linde” компаниясининг Европа ва Яқин Шарқ бўйича президенти Оливер Пфанн қатнашди.
Давлатимиз раҳбари ушбу учрашув Европа бизнесининг Ўзбекистондаги фаолиятни кенгайтиришга қизиқиши тобора ортиб бораётганидан далолат эканини катта мамнуният билан қайд этди.
Инвестициявий ва инновациявий шериклик, сув таъминоти, фуқаролик авиацияси, қурилиш материалларини ишлаб чиқариш, туризм ва бошқа соҳаларда аниқ лойиҳаларни амалга ошириш истиқболларига алоҳида эътибор қаратилди.
Европа компаниялари раҳбарлари Ўзбекистон Президентига самимий қабул ҳамда инвесторларнинг самарали фаолияти учун яратилаётган қулай шароитлар учун миннатдорлик изҳор этди. Устувор тармоқлардаги муҳим лойиҳа ва дастурларни амалга оширишда бундан буён ҳам иштирок этишга тайёр эканини билдирди.
Тошкент шаҳрида Миллий гвардия ва ички ишлар ходимлари ҳамкорлигида олиб борилган тезкор тадбир натижасида заргарлик дўконидан ўғирланган 49 миллион сўмлик тилла буюмлари ўз эгасига қайтарилди.
Пойтахтнинг Шайхонтоҳур тумани ИИО ФМБга Олмазор туманида яшовчи фуқаро M.С. томонидан мурожаат келиб тушган.
Унга кўра, фуқаро ўзи сотувчи бўлиб ишлайдиган Эски жўва бозорида жойлашган заргарлик дўконига жорий йилнинг 28 апрель куни номаълум аёл ўсмир бола билан келгани ва заргарлик буюмларини узоқ вақт кўриб, 49 миллион сўмлик тилла буюмларни танлагани ҳамда сотиб олиш истагини билдириб қўлига олган ҳолда ўғлига бергани, ўғли эса дарҳол номаълум томонга қочиб чиқиб кетгани ҳақида маълум қилган.
Дастлабки суриштирувлар натижасида ушбу аёл Қўқон шаҳрида яшовчи 49 ёшли Х.Г., ёнидаги ўсмир эса унинг 12 ёшли ўғли И.А. экани аниқланган.
Олиб борилган ҳамкорликдаги тезкор тадбирлар натижасида Миллий гвардия ходимлари томонидан воқеа жойидан қочиб кетган вояга етмаган бола қўлга олиниб, қимматбаҳо буюмлар ўрнатилган тартибда ўз эгасига қайтарилган.
Ҳозирда ички ишлар органлари томонидан суриштирув ишлари давом эттирилмоқда.
Россия Таълим ва фан вазири Валерий Фальков Ўзбекистонга ташрифи доирасида МИСиСнинг Олмалиқ шаҳридаги филиалида бўлди.
ОТМ 2018 йилдан буён филиал Ўзбекистон кон-металлургия саноати учун юқори малакали кадрлар тайёрлаб келмоқда. Бу ерда 850 дан ортиқ киши таҳсил олади. Олийгоҳ “Олмалиқ КМК”, “Навоий КМК”, «Ўзметкомбинат», «Ўзвтортсветмет» ва бошқалар учун кадрлар тайёрлаб беради.
Вазир бу ерда таълим юқори даражада ташкил этилганини қайд этди.
“Бу менинг Ўзбекистонга биринчи ташрифим ва шуни айтишим мумкинки, бу ерда кўрган Россия ОТМлари филиаллари мукаммал жиҳозланган, кадрлар тайёрлаш жараёни мутахассислар ким ва нима учун тайёрланаётганини яхши тушунган ҳолда ташкил қилинган. Ва энг асосийси бу ушбу ОТМларда мен ўқувчиларнинг ёниб турган кўзларини кўрдим. Азиз дўстлар, бу катта ютуқ, биз бундан буён ҳам фаол ишлашимиз, мамлакатларимизни янада ривожлантириш йўлида билим ва кўникмаларни оширишимиз керак”, — деди Россия Таълим ва фан вазири.
“Филиал фаол ва уйғун ривожланаётганини кўриб турибмиз. – Бу ерда юқори сифатли олий таълим олиш, ёшларни Россия ва Ўзбекистон маданияти ва тарихи ранг-баранглиги, мамлакатларимиз ўртасидаги дўстликнинг барча динамикасини чуқур англаган ҳолда тарбиялаш учун барча имкониятлар яратилган», – деди у.
Экология, атроф-муҳитни муҳофаза қилиш ва иқлим ўзгариши вазирининг тегишли буйруғига асосан Термиз ҳайвонот боғида сақланаётган Ўзбекистон Қизил китоби ҳамда Йўқолиб кетиш хавфи остида турган ёввойи ҳайвонлар ва ўсимликлар турлари билан халқаро савдо қилиш тўғрисидаги конвенсия иловаларига киритилган ҳайвонлар чиплаштирилиб, улар учун электрон паспорт тизими йўлга қўйилмоқда. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар қилди.
Ўзбекистон Республикаси Президентининг 2023 йил 31 майдаги “Экология, атроф-муҳитни муҳофаза қилиш ва иқлим ўзгариши вазирлиги фаолиятини самарали ташкил этиш чора-тадбирлари тўғрисида»ги 171-сонли қарори билан Тошкент, Фарғона ва Термиз ҳайвонот боғлари Экология вазирлиги тасарруфига ўтказилган эди. Ҳайвонот боғларининг моддий-техник базасини яхшилаш, сақланаётган ҳайвонларни асраб-авайлаш, уларнинг сонини кўпайтириш мақсадида эса Экология вазирлиги томонидан бир қатор чора-тадбирлар амалга оширилмоқда.
«Ҳайвонларнинг реестери юритилиб, электрон паспорт тизими йўлга қўйилиши жараёнида жониворлар ҳақидаги барча маълумотлар ягона электрон базага киритилади. Бу эса ушбу ҳайвонларнинг муҳофаза этилишини мунтазам назорат қилишга имкон беради», – деди Экология вазирлиги Биохилмахиллик сиёсатини юритиш бўлими бошлиғи Абдурашид Содиқов.
Дастлаб 4 бош ёввойи ҳайвон, қушлардан 2 та Ўзбекистон Қизил китобига киритилган оқ бошли қумой, чўл бургути ҳамда туёқлилардан 2 бош ҳайвон – морхўр, Бухоро тоғ қўйига чиплар ўрнатилди.
Маълумот учун, бугунги кунда Термиз ҳайвонот боғида жами 488 бош ноёб ҳайвонлар сақланмоқда. Шундан йиртқичлар 40 бош, судралиб юрувчилар 84 бош, туёқлилар 47 бош ҳамда қушлар 317 тани ташкил этади.
Сурхондарёда «Бойсун баҳори» халқаро фольклор фестивали бўлиб ўтаётган Туризм комплекси ҳамда тумандаги «Алпомиш» ўйингоҳида ҳаво шарларини учириш тадбирлари ўтказилмоқда.
Ушбу туристик тадбирда ранг-баранг ва турли намуналардаги жами 20 та ҳаво шари Бойсун устидан осмонда қуш парвози баландлигида кўтарилган.
Эътиборлиси, энг кўп – 20 та ҳаво шари парвози Ўрта Осиёда илк бор Сурхондарёда, Бойсун осмонида амалга оширилмоқда.
Маълумот учун, ҳаво шари илк бор 1783 йил Версалда учирилган. Шар 500 метр баландликкача кўтарилиб, 4 километр масофани учиб ўтган. Ҳаво шарининг ихтирочилари биринчи бўлиб ихтироларига ҳайвонларни чиқариб синаб кўришган.
“2024 йилда ипотека кредитларини ажратиш механизмларини такомиллаштириш ва аҳолининг уй-жой шароитларини яхшилашга оид қўшимча чора-тадбирлар тўғрисида”ги Президент Фармонига мувофиқ, 2025 йил 1 январдан қурилиш ташкилотларига “яшил” уй-жой стандартлари талаблари асосида кўп квартирали уй-жойларни қуриш учун Марказий банкнинг асосий ставкасидан бир фоиз бандга юқори ставкада кредитлар ажратилади.
2024 йил 1 октябргача “яшил” уй-жой стандартлари тасдиқланади.
2025 йил 1 апрелгача “яшил” уй-жой стандарти талаблари асосида қурилган уй-жойларни сотиб олиш учун жисмоний шахсларга “яшил” ипотека кредитларини ажратиш амалиёти йўлга қўйилади.
Ўзбошимчалик билан қурилган уй ва иморатлар аёвсиз бузилади. Бу ҳақида Кадастр агентлигининг Тошкент шаҳар бошқармаси бошлиғи Бекзод Ташходжаев маълум қилди.
Бугунги кунда кўплаб юртдошларимиз Олий Мажлис қонунчилик палатаси томонидан кўриб чиқилиб, Ўзбекистон Республикаси Сенатига юборилган “Ноқонуний ўзлаштириб олинган ҳамда мазкур ерларга ўзбошимчалик билан қуриб олинган объектларга нисбатан мулк ҳуқуқини эътироф этиш” тўғрисидаги қонунни кутишаётгани сир эмас.
— Ҳужжати йўқ уйларга кадастр ҳужжатларини қилиб бериш бошланиши ҳақидаги хабарлар тарқалганидан кейин айрим “уддабуронлар” тезкорлик билан иморат қуриб олиб, “бу уйни 5-10 йил олдин қурганман деб иддао қилсам ҳужжатлаштириб оламан” деб ўйлаши натижасида ҳудудларда ерларни ўзбошимчалик билан эгаллаб, қурилиш қилаётганлар ҳам учрамоқда.
Аммо “Қонун чиқса, уйимга ҳужжат қилиб оламан” деб ноқонуний қурилиш бошлаб юборганлар хато ўйлашади. Сабаби, Кадастр агентлиги томонидан ерларнинг ҳолатини ўрганиш бўйича космик съёмкалар, хариталари бор. Улар ёрдамида 5-10 йил, ҳатто 20 йил ортга қайтариб текширишимиз мумкин. Бу жараёнда инсонлар фақат ўзларига моддий зарар кўришлари билан бир қаторда, жиноий жавобгар бўлишлари мумкин.
Сабаби биринчидан ерларни ўзбошимчалик билан эгаллаб олганлик, у ерга ноқонуний қурилмани амалга оширганлик учун қонунчилигимизда Маъмурий жавобгарликдан, Жиноий жавобгарликкача чоралар белгиланган. Шунинг учун бундай тоифадаги инсонлар ҳозирги кунда ўзбошимчалик билан иморат қураётган бўлса, ўз-ўзидан тўхтатишларини ва ерни асл ҳолатига қайтаришларини сўраймиз.
Қабул қилиниши кутилаётган қонунда ҳозирги даврда эгаллаб олиб қурилиш қилаётган биноларга ҳуқуқни эътироф этиши назарда тутилмаган. Аксинча ҳозирда ерларни ўзбошимчалик билан эгаллаб, ноқонуний қурилиш қилаётганлар қонунбузурлик турига кўра маъмурий ёки жиноий жавобгарликка тортилади, — дейди Бекзод Ташходжаев.
Ер майдонларини ноқонуний эгаллаб олингани учун жиноий жавобгарлик Ўзбекистон Республикаси Жиноят кодексининг 1971 ҳамда 2291-моддаларида белгиланган. Энг муҳим қисмига тўхталиб ўтамиз.
2291-модданинг биринчи қисмига кўра, Ер участкаларини ўзбошимчалик билан эгаллаб олиш, шу жумладан ушбу ер участкаларига нисбатан қонуний ҳуқуқлари мавжуд бўлмаган ҳолда улардан фойдаланиш, худди шундай ҳаракатлар учун маъмурий жазо қўлланилганидан кейин содир этилган бўлса, — базавий ҳисоблаш миқдорининг уч юз бараваридан тўрт юз бараваригача миқдорда жарима ёки уч йилгача ахлоқ тузатиш ишлари ёхуд бир йилгача озодликни чеклаш ёки бир йилгача озодликдан маҳрум қилиш билан жазоланади.
2291-модданинг иккинчи қисмида, Суғориладиган ер участкаларини уларда қурилиш ишларини амалга оширган ҳолда ўзбошимчалик билан эгаллаб олиш, — базавий ҳисоблаш миқдорининг 400 бараваридан 600 бараваригача миқдорда жарима ёки 2 йилдан 3 йилгача озодликни чеклаш ёхуд 2 йилдан 3 йилгача озодликдан маҳрум қилиш билан жазоланиши белгиланган.
Б.Ташходжаев юртдошлардан ерга оид қонунчилик талабларига қатъий риоя қилишларини, ерларни ўзбошимчалик билан эгаллаб, ҳуқуқбузарлик ҳолатларига йўл қўймасликларини сўрамоқда.
“2024 йилда ипотека кредитларини ажратиш механизмларини такомиллаштириш ва аҳолининг уй-жой шароитларини яхшилашга оид қўшимча чора-тадбирлар тўғрисида”ги Президент Фармонига мувофиқ, дастур доирасида субсидиялар тўлашнинг амалдаги тартибига қуйидагиларни назарда тутувчи ўзгартиришлар киритилади:
субсидиялар ажратиш юзасидан аризалар тасдиқланган параметрлар доирасида 2024 йилнинг 15 майидан 1 ноябрига қадар қабул қилинади;
2024 йилги Дастур доирасида ажратиладиган кредитлар бўйича фоиз тўловларининг бир қисмини қоплаш учун субсидиялар – 12 фоиздан ошган қисмига, 2025 йил ва ундан кейинги йиллар Дастурлари доирасидаги кредитлар бўйича эса – Марказий банкнинг асосий ставкасидан ошган қисмига тўланади;
бирламчи уй-жой бозоридаги квартираларни сотиб олиш учун ажратилган ипотека кредитлари бўйича дастлабки бадалнинг бир қисмини қоплаш учун субсидиялар – 2024 йилги Дастурдан бошлаб қатъий белгиланган 30 миллион сўм миқдорида тўланади.
