Шахсий маълумотлар тўғрисидаги қонунга ўзгартиришлар киритилиб, веб-сайт эгаларига Ўзбекистон фуқароларининг шахсий маълумотларини Ўзбекистон ҳудудида сақлаш мажбурияти юкланди.

Ўзгартиришларга кўра:

– Ўзбекистон фуқароларининг шахсий маълумотлари жисмоний жиҳатдан Ўзбекистон ҳудудида жойлашган ва Давлат реестрида рўйхатдан ўтган техник воситалар ёрдамида қайта ишланиши керак;

– Маълумотларни локализация қилиш талаби ахборот технологиялари, шу жумладан Интернет орқали маълумотларни қайта ишлашга тааллуқли;

– Маълумотларни локализация қилиш, йиғиш, тизимлаштириш ва сақлаш талаби мулкдорда ёки операторнинг зиммасида ҳисобланади.

Ўзгартиришлар уч ой ичида — апрел ўрталаридан бошлаб кучга киради.

Бандлик ва меҳнат муносабатлари вазири Нозим Ҳусанов янги таҳрирдаги “Аҳоли бандлиги тўғрисида”ги қонун кучга кириши билан ишсизлик нафақасини тўлаш тартиби ҳам ўзгаришини маълум қилмоқда.

Унга кўра, ишсизлик нафақаси илгари ишламаган ва биринчи бор иш қидираётганларга 12 ойлик давр мобайнида фақат 13  ҳафта тўланган бўлса, эндиликда ишсизлик нафақаси барча тоифадаги ишсиз шахсларга 12 ойлик давр ичида 26 календарь ҳафта давомида тўланиши белгиланмоқда. 

Вазирнинг маълум қилишича, ишсизлик нафақалари қуйидаги миқдорларда тўланади:

– ишдан ва иш ҳақидан сўнгги 12 ой давр ичида маҳрум бўлган шахсларга — аввалги иш жойидаги ўртача ойлик иш ҳақининг 50 фоизи, лекин меҳнатга ҳақ тўлашнинг энг кам миқдоридан оз бўлмаган ва нафақани ҳисоблаш пайтидаги ўртача иш ҳақидан ортиқ бўлмаган миқдорда;

– ишдан ва иш ҳақидан маҳрум бўлган ҳамда узоқ (1 йилдан ортиқ) танаффусдан кейин меҳнат фаолиятини қайта бошлашга ҳаракат қилаётган шахсларга — меҳнатга ҳақ тўлаш энг кам миқдорининг 1 баравари миқдорида (1 февралдан 747 300 сўм);

– илгари ишламаган ва биринчи марта иш қидираётган шахслар учун — белгиланган меҳнатга ҳақ тўлаш энг кам миқдорининг камида 75 фоизи миқдорида.

–  Мазкур чоралар натижасида ишсизлар иш қидириш даврида моддий қўллаб-қувватланади ва 80 мингга яқин ишсизларга нафақалар тайинланади, — дейди Бандлик ва меҳнат муносабатлари вазири Нозим Ҳусанов.

Самарқанд вилояти аҳолисини табиий газ билан таъминлаш йўлида бир қатор амалий ишларни бажариш кўзда тутилган. Ана шу вазифалардан бири вилоятда табиий газ ҳисоби ва назоратининг автоматлаштирилган тизимини жорий этиш, яъни “ақлли” газ ҳисоблагичлар ўрнатишдан иборат.

Самарқанд вилоят Матбуот уйида “Hududgaz Samarqand” газ таъминоти филиали мутасаддилари иштирокида бўлиб ўтган матбуот анжуманида ана шу ва соҳанинг бошқа қатор долзарб масалалари хусусида сўз юритилди.

Филиал директори Олим Исоқулов дастлаб аҳолини қийнаётган масала, яъни ўтган ҳафта ва ундан олдинги кунларда, совуқ айни юқори нуқтасига чиққан пайтда газ босими жуда пастлашганлиги, айрим жойларда умуман бўламаганлиги сабаблари ҳақида ҳамда бундан кейин бу йўналишда аҳолини нима  кутаётганлиги хусусида сўз юритди.

 “Hududgaz Samarqand” газ таъминоти филиали томонидан 2020 йил давомида истеъмолчиларга 1,6 млн метр куб табиий газ ва 61,5 минг тонна суюлтирилган газ етказиб берилган.

Аҳолига етказилган табиий газ миқдори аввалги йилдагига нисбатан 150 минг метр куб кўплигига қарамасдан, у мавжуд эҳтиёжни қоплаш учун етарли бўлмади. Шу ҳақда гапириб, О.Исоқулов бундай аҳвол юзага келишининг қатор сабабларини санаб ўтди. Булар – 1957 йилдан бошлаб тортилиб келинган газ қувурлари эскирганлиги ва коррозияга учраганлиги учун табиий йўқотиш ҳажмининг катталиги, кўп қаватли уйларда иситиш тизимининг ишламаслиги, ўтган йили Самарқанд шаҳрида  газ тармоғига 7700 дан кўпроқ янги хонадон қўшилганлиги ва бошқалар.

“Ана шу омиллар ва ҳаво ҳароратининг кескин совиб кетиши оқибатида аҳолининг табиий газга бўлган талаби икки ҳиссага ортди ва вилоятнинг айрим маҳаллаларида газ тармоқларининг охирги нуқталарида газ босими меъёрдан пасайиши кузатилди. Ушбу муаммоларни бартараф этиш буйича барча куч ва техниклар ишга солиниб муаммолар бартараф қилинди” – деди нотиқ.

“Samarqandshahargaz” газ таъминоти бўлими бошлиғи Шавкат Усмонов вилоят марказида амалга оширилган ишлар хусусида аниқ мисоллар келтирди. Унинг уқтиришича, шу кунларда совуқ ҳаво оқими кириб келаётганлиги инобатга олиниб, мутасаддилар томонидан газ босимида салбий ўзгариш бўлиши олдини олиш учун барча чоралар кўрилган.

Газ таъминоти тизимини янада такомиллаштириш, бу борада аҳоли эҳтиёжини қондириш мақсадида истеъмолчиларга ақлли газ ҳисоблагичлари ўрнатилмоқда. Жорий йилнинг августигача ҳаммаси бўлиб 192 мингтадан кўпроқ ана шундай ҳисоблагич ўрнатилади. Ҳозиргача ўрнатилган 18 минг 600 та ҳисоблагичнинг 16 мингтага яқини онлайн биллинг дастурига уланган. Таъкидланишича, ҳисоблагичнинг ўзи ва уни ўрнатиш билан боғлиқ харажатларни “Ҳудудгазтаъминот” МЧЖ ўз зиммасига олган. Бошқача қилиб айтганда, истеъмолчи, яъни фуқаролар учун ушбу хизмат БЕПУЛ  амалга оширилади.

Табиий газ ҳисоби ва назоратининг автоматлаштирилган тизимини вилоят бўйича жорий этиш хизмати бошлиғи Сиддиқ Худойбердиев янги ҳисоблагичларнинг ўзига хос хусусиятлари ҳақида, уни ишлаш принципи хусусида батафсил сўз юритди. Ҳисоблагичнинг маълумот базасида кейинги 90 кун давомида истеъмол қилинган газ миқдори сақланиб қоларкан. Унга 5 йил давомида “Технопарк” МЧЖ томонидан бепул сервис хизматлари кўрсатиларкан. Тўланган пул тугаса, истеъмолчи телефонига СМС хабар юборилиб, қарзни тўлаш учун уч кун муҳлат берилар экан. Ҳисоблагич ҳар 8 йилда бир марта бепул техник кўрикдан ўтказилар экан.

Ҳисоблагичларни тез ва сифатли ўрнатиш учун 50 нафардан ортиқ газ пайвандловчи ва чилангарлар шартнома асоси филиалга ишга олинган, 10 та пудратчи қурувчи фирмалар билан шартнома тузилган ва 120 дан ортиқ ўрнатиш бригадалари ташкил этилган.

Янги электрон ҳисоблагичлар Самарқанд ва Каттақўрғон шаҳарлари истеъмолчиларига ўрнатилмоқда. Мутасаддиларнинг уқтиришича, бу иккала шаҳарда табиий газ истеъмоли ва қарздорлик даражаси юқори бўлганлиги учун ана шундай йўл тутилган. Ушбу  ҳудудларда бу ишни 1 мартгача якунлаш режалаштирилган.

Тошпўлат РАҲМАТУЛЛАЕВ,

Самарқанд вилояти бўйича ўз мухбиримиз

Бугунги кунда жамиятда судлар фаолиятини янада такомиллаштириш ва одил судлов самарадорлигини ошириш, фуқаро ва тадбиркорларнинг ҳуқуқ ва қонуний манфаатларини ишончли ҳимоя қилиш чораларини кучайтириш, одил судловни самарали таъминлаш ҳамда судьялар ҳамжамияти ролини ошириш бўйича устувор вазифалардан бири бўлиб келмоқда.

Маълумки, “Жиноят ишлари бўйича суд қарорларини қайта кўриш институти такомиллаштирилиши муносабати билан Ўзбекистон Республикасининг Жиноят-процессуал кодексига ўзгартиш ва қўшимчалар киритиш тўғрисида” ги Қонун Президент томонидан 2021 йил 12 январда имзоланди.

Қонун билан жиноят ишларини назорат тартибида кўриш инстанцияси бекор қилинди.

Суриштирувчи, терговчи, суд мажлиси котиби маълум бир ишда қатнашганидан сўнг кейинчалик уни қайта кўриб чиқиш учун суриштирувни, дастлабки терговни юритишда такроран иштирок этиши, шунингдек суд мажлиси баённомасини юритиши мумкин.

Эндиликда судда жиноят ишини муҳокама қилиш фақат айбланувчиларга нисбатан ва эълон қилинган айблов бўйича олиб борилади (илгари ҳақиқатни аниқлаш мақсадида – айбланувчи тариқасида ишда иштирок этишга жалб қилинмаган бошқа шахсларга нисбатан олиб борилган).

Судланувчини янги айблов бўйича жиноий жавобгарликка тортиш асосларини аниқлаш эндиликда судланувчининг, унинг ҳимоячисининг, қонуний вакилининг илтимосномасига кўра ҳам амалга оширилади (илгари ушбу тартиб фақат прокурорнинг ёки жабрланувчининг, унинг вакилининг илтимосномасига кўра амалга оширилган).

Шунингдек:

— биринчи инстанция судининг қонуний кучга кирмаган ҳукмлари устидан йигирма сутка ичида апелляция тартибида шикоят, протест берилиши мумкин бўлади;

-прокурорнинг айбловдан воз кечиши суд томонидан жиноят ишини реабилитация асосларига кўра тугатишга сабаб бўлиши белгиланди;

-апелляция инстанцияси судининг ҳукми, ажрими устидан кассация тартибида шикоят, протест берилиши мумкин бўлади;

-судланувчи содир этилган жиноятга дахлдор эмаслиги сабабли оқланган тақдирда, оқлов ҳукмининг қарор қисмида жиноят содир этган шахсларни аниқлаш ва уларни жиноий жавобгарликка тортиш учун иш прокурорга юборилиши кўрсатилади;

-кассация тартибида берилган шикоят, протест Ўзбекистон Республикаси Олий суди Жиноят ишлари бўйича судлов ҳайъатида кўрилади;

-кассация инстанцияси суди жиноят ишини Ўзбекистон Республикаси Олий суди раиси, Бош прокурори ва улар ўринбосарларининг Жиноят-процессуал кодексининг 497-17-моддасида назарда тутилган асосларга кўра киритган кассация протести бўйича кассация тартибида такроран кўриши мумкин бўлади.

Хулоса ўрнида шуни таъкидлаш жоизки, Мурожаатномада баён этилган ташаббуслар ва қонунчилика киритилаётган янги ўзгаришлар суд-ҳуқуқ тизимини ривожланишига, фуқароларнинг ҳуқуқлари ва эркинликларини сўзсиз таъминланишига хизмат қилади. Шу аснода жамиятимизда адолат ва қонун устуворлиги таъминланиб ижтимоий адолат кафолатланади.

Зеро, суд-ҳуқуқ тизимида амалга оширилаётган ислоҳотлардан кўзланган асосий мақсад шуки, юртимизда яшаётган ҳар бир инсонни рози қилиш, уларнинг эзгу орзуларини рўёбга чиқариш, инсонпарварлик тамойилларига асосланган демократик жамиятни барпо этишдан иборатдир.
Фаррух ТЎРАХОДЖАЕВ,
Тошкент шаҳар судининг
жиноят ишлари бўйича ҳайъати судьяси

Орамиздаги одамлар

Ўтган асрнинг 1960-1970 йиллари Тошкентнинг Лабзак кўчасида  жойлашган Николай Островский  номидаги пионерлар саройи ўқувчи болаларнинг  асал ари инидек ғужғон қайнаган суюкли масканларидан бири эди. Рассомлик, ганч-ўймакорлик, каштачилик, миллий рақс, созандачилик, фотосураткашлик, журналист-мухбирлик, ёш адабиётчилар тўгаракларига шаҳарнинг турли чекка-чеккаларидан ихлосмандлар  ёғилиб келишарди. Бадиий адабиётга, нафис сўз нафосатига бўлган меҳр-муҳаббат, ошифталик юзлаб болалар бошини қовуштирганди.

Айниқса, атоқли шоир, адиб Ғайратий (Абдураҳим Абдулла ўғли) раҳбарлик қилган адабиётчилар тўгарагининг довруғи бутун шаҳарга ёйилган, катта донг таратганди. Ҳайриддин Салоҳ, Эркин Воҳидов, Юсуф Шомансур, Анвар Эшонов, Анвар Исроилов, Тамилла Қосимова, Аброр Қосимов, Анвар Юсупов сингари қаламкашлар  номи газета журналлардаги шеър, ҳикоя, лавҳа, бадиалари орқали танилиб келганди.

Адабиёт машғулотлари  бир неча гуруҳларга бўлинган ҳолатда олиб бориларди. Пойтахтдаги мактаблар юқори синф ўқувчилари билан турли олий ўқув юртлари талабаларидан ташкил топган ёш ижодкорлар тўгаракнинг нисбатан  “катталар” гуруҳини ташкил этганди. Улар биздан етти-саккиз ёшлар чамаси катта эди; бир қанча кўйлакни кўпроқ йиртишганди, деса ҳам бўлади. Биз, ўн уч — ўн тўрт  ёшлик ўқувчилардан иборат тўгарак машғулотлари алоҳида ўтарди.

Устоз Ғайратийнинг  зўр бир олижаноб одати бор эди. Тўгаракка янги келган аъзолардан “Нима  ёзиб келдинг, шеърми, ҳикоями”, – деб сўрар, ўзига ўқитар, кейин тўгарак аъзоларини бирма-бир, номма-ном таништириб чиқарди. Шеър, ҳикоянинг бадиий хусусиятлари ҳақидаги фикр-мулоҳазаларини айтиш баробарида ўзини ҳам таништирарди. Биз, “Қибрай садоси” газетасининг ҳозир ҳам фаол муаллифларидан бўлган  Носир Тоиров билан шу тўгарак йиғинларида танишганмиз. Носир, ўша пайтдаги Қибрай туманининг Қўйлиқ қишлоғидан, мен – шаҳар чеккасидаги Яланғоч ота қишлоғидан Лабзакка қора тортиб боргандик. 

Иккимиз ҳам дастлабки машқларимизни ўқиб бердик. Носирнинг шеъри ёмғир тўғрисида эди. Менинг машқим “Тоғ сувлари”, деб аталарди. Устоз Ғайратий  иккимизга ҳам машқларни давом эттиришни тайинлади. Шеър унсурлари  – вазн, туроқ, қофия ҳақида  тушунча-сабоқлар берди.

Ҳали-ҳали эсимда. Ўшанда биз билан  бир кунда  келган Муроджон Мансур бир варақдан иборат шапалоқдек  ҳикоясини ўқиганди. Табиатнинг кўркам лавҳасини тасвирлар экан, охирида  қиссадан ҳисса тарзида умумлашма хулосасини   ҳам айтганди. Ана шу  ибратли  фикр устоз Ғайратийга  манзур бўлганди.  Рағбат кўрсатиб, “ҳикоя ёзишга  қўлинг анча келиб қолибди. Худди шу маромда  изланишда давом этавер”, дегандек маслаҳат берганди.

Кейинчалик Муроджон  ака таниқли ёзувчи бўлиб танилди. Катта шуҳрат эътибор қозонди. “Садарайҳон”, “Умр чорраҳалари, “Қирғоқлар”, “Ҳаммани яшагиси келади”, “Ёмби” каби қиссалари, “Мангу жанг”, “Гуноҳи азим” сингари романларини, уч китобдан иборат “Жудолик диёри” трилогиясини эълон қилди. Халқимизнинг ардоқли, атоқли ёзувчисига айланди.

Биз, Носир билан иштирок этган гуруҳдан  кейинчалик  ўзбек фантастика адабиётининг асосчиси  Хожиакбар Шайхов  етишиб чиқди. Унинг “Ренс жумбоғи”, “Ғаройиб кўланка”, “Олмос жилоси”, “Сўнгги  аждарнинг ҳамласи”, “Ёнар дарё”, “Сеҳрли қиз”, “Телба дунё”, “Туташ оламлар”, “Жодугарнинг эри” сингари ҳикоя, қисса, романлардан  ташкил топган ўттиздан зиёд китоблари нашр этилди.

Шоирлардан Турсуной Содиқова, Тўлаган Тўхтаев, Сабриддин Садриддинов каби истеъдодлар камол топди. Биргина Турсуной Содиқова юзга яқин  шеърий асарларини, маънавий-аҳлоқий мавзудаги одоб-таълим-тарбияга оид публицистик мажмуаларини эълон қилди. Эл-юрт назарига тушди, меҳрини қозонди.

Яна кўплаб адабиётшунос, журналист, матбуот саркорлари тўгарак машғулотлари қозонида қайнади. Шеър, ҳикоя, лавҳа, этюд, эсселардан иборат ижод намуналари републикамизнинг нуфузли газета-журналларида ёритилди. Шу жумладан Носир билан бизнинг  ҳам изланишларимиз шеър, баллада, эртак, бадиалар тарзида “Ёшлик” баёзларида, “Орзу чиқди рўёб” каби мажмуаларда нашр этилди. Носир Тоиров 1963 йилда Қибрайдан армия сафларига кетиб, 1966 йилда қайтиб келди. Ҳарбий хизматда бўлган йиллари ҳам матбуотда тез-тез материаллари чоп этиб борилди.

Бадиий сўз сеҳрига ошифталик, адабиётга бўлган адоқсиз меҳр-муҳаббат Носир билан бизни бир-биримизга  яқинлаштирди, дўстлаштирди. Фикрдош, елкадош қадрдонларга, ҳамкор-ҳамнафас биродарларга  айлантирди. Мана шунга ҳам  олтмиш йилдан ортиқ муддат кечибди-я. Умр деганлари елдек келиб, селдек  ўтиб кетавераркан. Носир билан тез-тез  кўришиб турмасак, сидқидилдан ёзилиб суҳбатлашмасак, жилла қурса телефонда боғланиб турмасак, янгиликлар билан бўлишмасак, интиқлик сезамиз. Бир-биримизнинг  кўз қарашларимизни, сўзларимизни  соғинишиб қоламиз.

Мутафаккир адиб  Асқад Мухтор  асарларида “собир”  сўзини кўп қўллайди. “Сабр-қаноат”, “тўзим-қатъият”, “собитлик” сингари маъноларни англатади ифода-талқинларида.

Дўстим Носир Тоировда  ана шундай файзиёб  фазилатлар  мужассамлашган. Қадрдон биродарларга, адабиётга, журналистлик  касбига, устозларга, оила-фарзандларига собит-собир  эътиқод, садоқат ҳавас қилгулик даражада дўстим Носир шахсиятини  безаб келаётир.

         Ўзбекистон Республикаси Президенти Ш.М.Мирзиёевнинг ижодий ходимлар билан бўлган учрашувлари ҳақидаги эссе, матбуот юзини кўрган талай шеърлари, адабий-публицистик  мақолалари, ўзбек халқининг асл фарзандлари Алишер Навоий, Шароф Рашидов, Асил Рашидов, Мирзамаҳмуд Мусахонов, Эркин Воҳидов, Абдулла Орипов, шунингдек, Оқил Салимов, Алишер Усмонов, Маҳмуд Тоир, Нуриллоҳ Остон ва бошқалар ҳақида “Қибрай садоси”, “Тошкент ҳақиқати”, “Ташкентская правда” “Оила даврасида” “Нуроний” “Ўзбекистон овози”, “Голос Узбекистана”, “Халқ сўзи”, “Народное слово”, “Правда Востока” газеталари, “Мулоқот”, “Хумо” “Ўзбекистон қишлоқ хўжалиги” журналларида чоп этилган ва интернет сайтларида жойлаштирилган материаллари, “Журналистикага садоқат” китоби Носирнинг толмас, фидойи, заҳматкаш  қаламкаш сифатида танитди. “Ўзбекистон овози” республика газетасидаги адабий таржимонлик, “Қибрай садоси” туман газетаси редколлегия аъзоси сифатидаги жўшқин фаолияти Носир Тоировнинг ўз касбига, бадиий сўзга, матбуотга нечоғлиқ улкан муҳаббати, собир-собит садоқат тасдиғидир. Бу ҳам  ёруғ салоҳиятнинг амалдаги тасдиғидир. Сўнмас, сўлмас қобилиятнинг кўриниши, намоён бўлиш шаклларидан биридир.

Меҳр-эътиқод ҳам сўзда, ҳам кўзда, ҳам ўзида зоҳир бўларкан. Ўзлигини зуҳур этаркан.

Ҳамиша омон бўлинг, бор бўлинг, қадрдоним Носирхон.

Нўъмон Раҳимжонов,

филология фанлари доктори, профессор,

Ўзбекистонда хизмат кўрсатган маданият ходими.

Қибрай тумани, Яланғоч ота қишлоғи.

Бугун Ўзбекистон Миллий Матбуот марказида ажойиб журналист, камтарин ижодкор Шарофиддин Тўлаганов “Турбат йўлидаги қайдлар” номли китобининг тақдимоти бўлиб ўтди. Ушбу китоб ижодкорнинг болаликдан то шу вақтгача бўлган умр йўллари, ҳамда ҳаёт ҳақиқатлари ҳақида ёзилган.
Чамаси. 1995 йилнинг баҳор ойлариниг илк кунлари эди. Ўзбекистон радиосига ишга қабул қилинувчилар учун махсус комиссия суҳбатидан ўтишлари лозим бўларди.Китобнинг сўз боши таҳминан шундай сўзлар билан бошланади.
Хонага сочлари тик ўсган йигит кириб келди. Қўлидаги ишга кириш учун ёзилган анкета ҳамда “Ҳалқ сўзи”, “Ўзбекистон овози”, “Тошкент оқшоми”, “Ишонч” каби газеталарида босилган мақолалари авайлаб тикилган папкани комиссия аъзоларига топширди. Хужжат ва мақолалар билан танишиб чиққандек бўлдик. Анкетада “туғилган жойи” деган банд “Чимкент вилояти “ дея тўлдирилган эди. Чимкент вилояти (ҳозирги Туркистон вилояти) да ўзбеклар кўпчиликни ташкил қилади. Аммо ўзлари яшайдиган туманларга қараб уларнинг урф-одатлари. Шевалардан бироз фарқи бор. Шуни инобатга олиб “вилоятнинг қаеридансиз?” дея савол берилди.
-Турбатдан,- дея жавоб берди йигит.

• Ия, Туроб аканинг қишлоғиданми? –дедим.
  Ўзбекистон ҳалқ шоири Туроб Тўлани назарда тутиб. Қишлоғини билишимизни эшитиб йигитнинг кўзлари чақнаб кетди.
  Бўлажак журналистни саволга тутган, Ўзбекистонда хизмат кўрсатган журналист, ЎзА бош директори Абдусаид Кўчимов эдилар.
  8-9 ёшли болакай ниятини амалга оширриш мақсадида қишлоғи Турбат номини илк мустақил ёзган китобга беришдан иборат бўлди.
  Ёшликдан китобга меҳр қўйган йигит улғайиб, ўз сиёсий қарашлари, ёзган ҳикоялари ортидан жуда катта муваффақиятларга эришди. Устозлар меҳрини қозонди. Жумладан, у ўз қишлоғига бўлган садоқатини ёзган китоби орқали изҳор эта олди. Болаликдан онасидан эшитган хикояларини ушбу китобга киритиб борди. Чунки Шарофиддин тўлаганов зиёли авлоднинг фарзанди. Шу боис у ҳам ёшликдан китобга меҳри бўлакча эди. Ижодкорнинг ёзган китобида Эркин Воҳидовнинг шеърларини кўп бора тилга олганлар. Бундан кўриниб турадики, Эркин Воҳидовнинг шеърларига ихлоси баланд.
  Ушбу китобда Шарофиддин Тўлагановнинг қишлоғида ўтган веқеалар тасвирланган, оққа кўчирилган. Бир сўз билан айтганда реал воқеалар асосида ёзилган десак муболаға бўлмайди. У ўз қишлоғини довруғини танитишга ҳаракат қилди. Китобнинг номи нима учун айнан “Турбат йўлидаги қайдлар”? деб номланганлиги биринчидан, 8 ёшидаги ниятини амалга ошириш учун ҳар гал Тошкентден Турбат сари йўлга чиққанида ҳаёлидан ўтган воқеаларни ён дафтарига қайд қилиб борар эди.
  Биз ҳам Шарофиддин акага кейинги ижодий ишларида муваффақиятлар тилаб, “Турбат йўлидаги қайдлар” китобини ўқиб олам-олам тааьссуротлар олишингизни истаб қоламиз.