24.2 C
Узбекистан
Среда, 24 апреля, 2024
Домой Блог Страница 442

Х.Сулаймонова номидаги Республика суд экспертизаси марказида медиа тур ўтказилди

Адлия вазирлиги ҳузуридаги Х.Сулаймонова номидаги Республика суд экспертизаси маркази жамоатчилик билан кенг, очиқ форматдаги интерфаол мулоқот ташкил этиш мақсадида ОАВ ходимлари учун медиа тур ва матбуот анжумани ўтказилди. Унда марказ томонидан амалга оширилаётган ишлар, жумладан суд экспертизалари лабораториялари фаолияти, уларнинг турлари ва тартиблари, шунингдек, йўлга қўйилиши кутилаётган янги лойиҳалар тўғрисида маълумотлар берилди.

Шу мақсадда, Марказ томонидан Ўзбекистон Республикаси Президентининг 2021 йил 3 февралдаги ПФ-6155-сон “2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид давлат дастури тўғрисида”ги Фармони ижроси ва 2020 йилда амалга оширилган ишлар, келгуси режалар, Марказ томонидан йўлга қўйилиши кутилаётган янги лойиҳалар тўғрисида ОAВ ва жамоатчиликни хабардор қилиш, медиа ҳамжамияти билан яқин мулоқот ўрнатиш мақсадида жорий йилнинг 22 феврал куни соат 1500 да Х.Сулаймонова номидаги Республика суд экспертизаси маркази биносида оммавий ахборот воситалари вакиллари, журналист ва блогерлар учун матбуот анжумани ва медиатур ўтказилди.

Тадбирда Адлия вазирлиги ходимлари ва ОАВ вакиллари иштирок этди.

Таъкидланишича, марказда янги 5 та экспертиза тури, яъни Суд-компьютер-техникавий, Суд-автомобиль йўллари, Суд-электротехника, Суд-психологик, Озиқ-овқат маҳсулотларининг суд экспертизалари турлари жорий қилиниб, ҳозирги кунда умумий ўтказиладиган экспертиза турлари 50 тага, экспертлик мутахассисликлари сони 69 тани ташкил қилади.

БМТнинг ҳамкорлигида Марказ лабораторияларининг “Тадқиқот ва калибровка лабораториялари ваколатлилигига қўйиладиган умумий талаблар” ISO/IEC 17025 халқаро стандартига мувофиқ аккредитация қилиниб, мувофиқлик сертификатига эга бўлгани қайд этилди.

Шунингдек, Марказни Бутунжаҳон суд экспертлари ассоциациясига (IAFS) аъзо  бўлиш учун тегишли амалга оширилаётган ишлар бўйича маълумот берилди.

Соҳа фаолиятини ривожлантириш мақсадида 2020 йилнинг 24 мартида Вазирлар Маҳкамасининг 180-сон “Нодавлат суд-экспертиза ташкилотлари фаолиятини ташкил этиш бўйича низомларни тасдиқлаш ҳақида”ги қарори қабул қилинди.

Қарор билан нодавлат суд-экспертиза фаолиятига рухсат берилгани айтиб ўтилди.

Шунингдек, Суд экспертларининг малакасини ошириш ўқув маркази учун “Электрон таълим платформаси” онлайн тизими ишлаб чиқилиб, амалиётга жорий этилган бўлиб, 9 нафар талабгорлар белгиланган тартибда имтиҳондан ўтказилиб, талабгорлар нодавлат суд экспертларни қайта тайёрлаш курсларида масофавий тарзда ўқитилмоқда.

Иштирокчиларнинг суд-экспертиза фаолиятига оид барча саволларига давлат суд экспертлари томонидан жавоб берилди.

Адлия вазирлиги
Жамоатчилик
билан алоқалар бўлими

Президент Қарорлари ва топшириқлари ижроси: янги тизим тақдимоти

Бугун, 22 февраль куни Миллий матбуот марказида Ўзбекистон Республикаси Президентининг  2021 йил 10 февралдаги  “Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида”ги ПФ–6166-сон Фармони юзасидан матбуот анжумани бўлиб ўтди.

Тадбирда Адлия вазирлигининг масъул ходимлари иштирок этиб, мазкур Фармонни қабул қилиш зарурати ва мақсади, шунингдек Президент Қарорлари ва топшириқлари ижроси янги тизим ҳақида тўхталиб ўтишди.

Такидланишича, қонунчилик ҳужжатларининг ўз вақтида, сифатли ва тўлиқ ижро этилиши ислоҳотлар самарали кечишининг гарови ҳисобланади.

Бироқ, таҳлиллар натижасида ижро интизоми самарасиз даражада эканлигидан далолат берувчи кўплаб ҳолатлар аниқланган.

Шу муносабат билан қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга қаратилган мазкур Президент Фармони қабул қилинди.

Фармонга мувофиқ “Ijro.gov.uz” тизими орқали қонунчилик ҳужжатлари ва топшириқлар ижросини назорат қилишнинг мутлақо янги тизими жорий этилади.

Мазкур тизим орқали ижрони назорат қилишга Адлия вазирлиги ҳам жалб этилиб, вазирликка “Ijro.gov.uz” тизимини юритиш ва назоратни олиб бориш бўйича қўшимча вазифалар юклатилди.

Эндиликда Адлия вазирлиги тизимга назоратга олинадиган топшириқларни киритади, масъул ижрочилар ва бажариш муддатларини белгилайди, улар томонидан киритилган маълумотлар тўлиқлиги ва ҳаққонийлигини текширади.

Шунингдек, давлат органлари ва ташкилотларнинг ижро муддатларини узайтириш ҳақидаги таклифлари асослилигини ўрганади.

Ушбу Фармон билан ижрочиларнинг қонунчилик ҳужжатлари ва топшириқларнинг ижро этилишидаги масъулиятини янада кучайтириш мақсадида тизимга зарур маълумотларни ўз вақтида киритмаслик ёки нотўғри маълумотларни киритиш, бу борада Адлия вазирлиги кўрсатмаларини ўз вақтида ёки лозим даражада бажармаслик учун жавобгарлик жорий этилиши белгиланди.

Давлат органлари ва ташкилотлар томонидан юқоридаги талабларнинг бажарилмаслиги қонунчиликка мувофиқ интизомий, маъмурий ва бошқа жавобгарликка сабаб бўлади.

Жорий этилаётган янги тартибга мувофиқ 2021 йил 1 апрелдан бошлаб, барча республика даражасидаги давлат органлари ҳамда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг ижро интизомига масъул бўлинмалари раҳбарларини лавозимга тайинлаш ва лавозимдан озод этиш масалалари мажбурий тартибда Ўзбекистон Республикаси Президенти Администрацияси билан келишилади.

Барча давлат органлари ва ташкилотлари ҳамда маҳаллий давлат ҳокимияти органларида ижрони назорат қилиш, назорат картотекаларини юритиш ва ҳисоботларни шакллантириш 2021 йил
1 майдан бошлаб фақат “Ijro.gov.uz” тизимида амалга оширилади.

Шунингдек, матбуот анжуманида ОАВ вакилларининг янги тизим бўйича ўзларини қизиқтирган саволлариги Адлия вазирлиги масъул ходимлари томонидан жавоб берилди.

Адлия вазирлиги Жамоатчилик

билан алоқалар бўлими

Коронавирусга қарши биринчи навбатда вакцина олувчилар рўйхати қайта кўриб чиқилади

Коронавирусга қарши биринчи навбатда вакцина олувчилар рўйхати қайта кўриб чиқилади. Бунга мазкур рўйхатга журналистлар, блогерлар ва оммавий ахборот воситалари ҳамда жамоат транспорти ходимлари, шунингдек чет давлатларда таҳсил олувчи талабалар ва меҳнат мигрантлари ҳам киритилганлигининг ижтимоий тармоқларда қизғин муҳокама қилинаётгани сабаб бўлган.

Бу ҳақда бугун, 22 февраль куни Олий Мажлис Қонунчилик палатасида эшитилаётган ССВ вазири ўринбосари Б. Юсупалиевнинг аҳолини коронавирусга қарши эмлаш борасида режалаштирилаётган ишларга оид ахбороти муҳокамасида айтиб ўтилди.  

Таъкидланишича, коронавирусга қарши биринчи навбатда вакцина олувчилар рўйхати юзасидан халқ вакиллари томонидан Ҳукуматга бир қатор таклифлар берилган.

Парламент эшитувида халқ вакиллари кекса ва нуронийлар, ижтимоий ҳимояга муҳтож, яъни “Темир дафтар”га киритилган ва ногиронлиги ҳамда сурункали касалликлари бўлган шахслар, тиббиёт ходимлари, мактаб ўқитувчилари, мактабгача таълим ташкилотлари, шунингдек ҳуқуқни муҳофаза қилиш органлари ходимларини биринчи навбатда эмлаш ишларини ташкил қилиш мақсадга мувофиқ бўлар эди, деган таклифни илгари сурди.

Халқ вакилларининг ҳудудлардаги фаолияти доирасида коронавирусга қарши эмлаш ишларининг ташкил қилиниш жараёнлари устидан ҳам таъсирчан парламент назорати ўрнатилиши айтиб ўтилди.

Тошкент вилоятида Фармацевтика техник университети очилади

Қибрай туманида фармацевтика кластери доирасида Фармацевтика техник университети ташкил этилади. Бу ҳақда Norma.uz хабар бермоқда.  

Қайд этилишича, Фармацевтика техник университети Тошкент вилояти Қибрай туманида “Tashkent Pharma Park” инновацион илмий-ишлаб чиқариш фармацевтика кластери доирасида ташкил этилади. 

Университет дори воситалари, тиббий буюмлар ва тиббий техника ишлаб чиқариш, косметология, тармоқ ва бизнесни бошқариш соҳаларида халқаро таълим стандартларига мувофиқ малакали кадрлар тайёрлайди.

Эслатиб ўтамиз, 2020 йил 28 апрелда “Tashkent Pharma Park” инновацион илмий-ишлаб чиқариш фармацевтика кластерини ташкил этишга доир президент қарори қабул қилинган  ва унда кластерга Тикланиш ва тараққиёт жамғармаси томонидан 50 миллион долларгача суммада маблағлар ажратиш белгиланган эди.

“Tashkent Pharma Park” кластерининг илмий-таълим таркибий қисмини молиялаштириш манбаи Корея Эксимбанкининг Иқтисодий ҳамкорлик ва тараққиёт жамғармаси (EDCF) линияси бўйича 136 миллион АҚШ доллари миқдоридаги узоқ муддатли кредитлари ҳисобланади.

Кобулда бир нечта портлаш содир бўлди

Полициянинг маълумот беришича, дастлабки иккита портлаш 15 дақиқа оралиқда, учинчиси эса икки соатдан сўнг юз берган.

Афғонистон пойтахти Кобулда қатор портлашлар содир бўлди. Бу ҳақда Associated Press хабар бермоқда.

Портлашлар оқибатида камида беш киши ҳалок бўлган, яна икки киши жароҳатланган.

Полициянинг маълумот беришича, дастлабки иккита портлаш 15 дақиқа оралиқда, учинчиси эса икки соатдан сўнг юз берган.

Ҳозирча портлашлар учун жавобгарликни ҳеч бир гуруҳ ўз зиммасига олмаган.

Январ охирларида ҳам мамлакатда бир кун ичида бир нечта портлаш содир бўлганди.

Манба: kun.uz

Тошкентда калтакланган йигитлар мебель дўконини ёқиб ўч олишди

0

Тергов департаменти хабарига кўра, 2021 йилнинг 14 февраль куни соат 19:00 ларда Чилонзор тумани Гулистон мавзеси ТХАЙ кўчасида гумма сотувчи Ёдгор А. ва уни олдин урган Саиджон С., Жавоҳир Т. билан жанжал содир бўлди.  

Саиджон С., Жавоҳир Т. билан Lacetti’да келиб, Ёдгор А.ни тўхтатишган вақтида, у ушбу автомашинани олд ва икки олд эшиклари ойналарини аравада бўлган стол оёғи билан уриб синдириб, ушбу стол оёғи билан Саиджон С.га ҳам тан жароҳати етказган. Ушбу жанжалга Ёдгор А.нинг қариндоши Баҳодир К. ҳам қўшилиб, қўлидаги темир қувур (труба) билан Саиджон С.га тан жароҳати етказган.

Ушбу жанжалдан сўнг, 15 февраль куни соат 04:50 да, Саиджон С. ва Жавоҳир Т.лар қасд олиш мақсадида, Баҳодир К.га тегишли, укаси Комил К.нинг номида бўлган Зангиота тумани Эшонгузар қўрғони ҳудудидаги “Ҳалима ҳожи она” мебеллар дўконига қасддан ўт қўйиб, жами 500 млн сўмлик моддий зарар етказади.

Шунингдек, ушбу мебель дўконига туташган “Grant Builder” МЧЖнинг сотув маркази биносининг бир қисмига ҳам ёнғин ўтиб, 100 млн сўмлик моддий зарар етказилган.

Ушбу ҳолат бўйича Зангиота тумани ИИБ ҳузуридаги Тергов бўлими томонидан Саиджон С. ва Жавоҳир Т.ларга нисбатан Жиноят кодексининг 173-моддаси 2-қисми “в” банди билан жиноят иши қўзғатилган.

Дастлабки тергов жараёнида, Саиджон С. ва Жавоҳир Т.лар жиноят ишида айбланувчи тариқасида жалб қилиниб, “қамоққа олиш” тарзидаги эҳтиёт чораси қўлланилган.

Шунингдек, Ёдгор А. ва Баҳодир К.ларга нисбатан Чилонзор тумани бўйича ИИО ФМБ ҳузуридаги Тергов бўлинмаси томонидан ЖКнинг 277-моддаси 2-қисми “Б, в” бандлари билан жиноят иши қўзғатилган.

Ёдгор А. ва Баҳодир К.лар ҳам жиноят ишида айбланувчи тариқасида ишга жалб қилиниб, уларга нисбатан “қамоққа олиш” тарзидаги эҳтиёт чораси қўлланилган. Ҳозирда тергов ҳаракатлари давом этмоқда.

Тошкентдаги сув таъминоти тизимини яхшилаш учун Франция ҳукумати 145 млн евро ажратади

Франция ҳукумати Тошкент шаҳрининг сув таъминоти тизимини яхшилаш лойиҳасини амалга ошириш учун 145 млн евро миқдорида маблағ ажратишни маъқуллади. 

Бу ҳақда жорий йил 20 февраль куни “SUEZ” компаниясининг (Франция) катта ижрочи вице-президенти Эрик Гебали Ўзбекистон Инвестициялар ва ташқи савдо вазири Сардор Умурзоқов билан бўлиб ўтган учрашувида маълум қилди.

Учрашувда Эрик Гебали Ўзбекистонда бир қатор ижтимоий йўналтирилган лойиҳаларни амалга оширишда иштирок этиш бўйича режалари ҳақида ҳам сўз юритди. 

Улардан бири Қорақалпоғистон Республикаси, Бухоро ва Қашқадарё вилоятларидаги умумтаълим мактабларини ичимлик суви билан таъминлаш лойиҳаси бўлади. Лойиҳани рўёбга чиқариш компания томонидан грант асосида ажратилган маблағлар ҳисобига амалга оширилади.

Учрашув якунида Франция компанияси раҳбарияти Ўзбекистонда лойиҳаларни амалга ошириш билан боғлиқ барча масалаларни ҳал этишда самарали кўмак беришга ҳамда белгиланган йўналишлардаги ҳамкорликни янада кенгайтириш бўйича биргаликда ишлашга тайёрлигига ишонтирилди.

Фарғонада ҳакамни тепган футболчи озодликка чиқарилди

“Нефтчи” – “Турон” ўйинидан кейин учрашув ҳакамини тепган Жамшид Тўрақулов ва учрашув ёрдамчи ҳакамига нисбатан тажовузкор ҳаракат қилган Достонбек Тошматов озодликка чиқарилди. Бу ҳақда “Нефтчи” футбол клуби Матбуот хизмати хабар берди.

Улар 1 декабрдан буён ҳибсда қолаётган эди.

Эслатиб ўтамиз, ЎФA Тартиб-интизом қўмитаси Ж. Тўрақуловга нисбатан 10 йил муддатга футбол билан боғлиқ ҳар қандай фаолият билан шуғулланишдан четлатиш интизом чорасини қўллаганди.

Д. Тошматов 10 та расмий учрашувга дисквалификация қилинганди.



Тадбиркорлар ҚҚС бўйича ноҳақ бўлиб чиқди

0

Давлат солиқ қўмитаси томонидан солиқларни камроқ тўлаш мақсадида, пул маблағларини нақдлаштириш билан шуғулланувчи 396 та “бир кунлик фирмалар” хизматидан фойдаланган 10 мингга яқин ташкилотлар рўйхати шакллантирилиб, 5 кун муддатда инкассо топшириқномалари қўйилиши бўйича хабарномалар юборилганди.

ДСҚнинг маълум қилишича, фаолияти шубҳали деб топилган корхоналар билан амалга оширилган битимларни ўрганиб чиқиш учун тезкор равишда камерал солиқ текширувлари ташкил этилмоқда.

Жорий йилнинг 20 февраль ҳолатига республика бўйича жами 2 358 та корхонада 528,5 млрд сўмлик асоссиз ҳисобга олинган қўшилган қиймат солиғи (ҚҚС) суммаларига аниқлик киритиш бўйича камерал солиқ текширувлари якунланди.

Натижада:

– 2 216 та, яъни 94% корхонада (492,8 млрд сўм) “сохта” операцияларни амалга ошириш фактлари тасдиқланди;

– 57 та, яъни 2,4 фоиз (8,1 млрд сўм) ташкилотда ҚҚС суммасини ноқонуний ҳисобга олиш факти қисман тасдиқланди;

– 85 та, яъни назорат тадбирлари ўтказилган 3,6% солиқ тўловчилар томонидан 27,6 млрд сўмлик ҚҚС суммасини тўғри ҳисобга олганлиги ҳолатлари бўйича асословчи ҳужжатлар тақдим этилди. Шу сабабли улардан ортиқча олинган маблағларни қайтариш бўйича тезкор жараёнлар бошланди. 

Шунингдек, 118 та корхона томонидан ҚҚС суммасини тўғри ҳисобга олиш билан боғлиқ йўл қўйилган бошқа ҳуқуқбузарликлар ҳам аниқланиб, уларга нисбатан 5,3 млрд сўмлик солиқлар қўшимча ҳисобланди.

Тошкент вилоятида 3 та ҳовлини қалбаки ҳужжатлар билан сотаётган жиноий гуруҳ ушланди

0

Жорий йил 17 февраль куни Тошкент вилояти ИИББга Тошкент шаҳрида яшовчи фуқаро Р.Т. ариза билан мурожаат қилган.

У мурожаатида “Дилнура”, “Нодира” ва “Азиз” исмли шахслар Нурафшон шаҳрида жойлашган (аслида ҳеч қаерда рўйхатда бўлмаган) 3 та ҳовлини кадастр ҳужжатларини қалбакилаштириб, 100 000 АҚШ долларига сотмоқчи бўлаётганини маълум қилиб, ушбу шахсларга нисбатан қонуний чора кўришни сўраган. Бу ҳақда ИИББ Ахборот хизмати хабар берди.

19 февраль куни ўтказилган тезкор тадбирда, Нурафшон шаҳрида яшовчи 1980 йилда туғилган Дилнура А. танишлари 1997 йилда туғилган Азиз Ғ. (2019 йилда фирибгарлик жинояти билан судланган) ва 1997 йилда туғилган Нодира И.лар ариза муаллифидан талаб қилинган пулларнинг 30 000 АҚШ долларини олаётган вақтида, вилоят ИИББ ходимлари томонидан далилий ашёлар билан қўлга олинади.

Ушланган шахслардан 30 000 АҚШ доллари миқдоридаги нақд пул, Нодира И. ва Гулнора А. номига расмийлаштирилган Нурафшон шаҳар Наврўз МФЙда жойлашган “18-А” ва “18-Б” рақамли ва Дилнура А. номига расмийлаштирилган “Истиқлол” МФЙда жойлашган 10 рақамли уйларнинг қалбакилаштирилган (ҳоким қарор ва бошқалар) кадастр ҳужжатлари холислар иштирокида далилий ашё сифатида расмийлаштирилиб олинган.

Ҳозирда қўшимча суриштирув ишлари олиб борилмоқда.

Ўзгидромет ҳавонинг кескин совишидан огоҳлантирди

0

Ўзгидромет хабарига кўра, 23-26 февралда Ўзбекистон ҳудудига Волгабўйи орқали Россиянинг Европа қисми ҳудудлари устида шаклланган совуқ ва нам ҳаво массалари кириб келади.  

23 февралда республика бўйича ёмғир ёғади, 24 февралда ёғингарчилик (ёмғир, қор) бўлади, тоғолди ва тоғли ҳудудларда баъзи жойларда кучли бўлади.

Ҳаво ҳарорати 24 февралда кечаси ва кундузи +2…+7 илиқ бўлади, 25-26 февралда ҳарорат кечалари -7…-12 совуқгача, кундуз кунлари -2…-7 совуқгача пасаяди.

Қорақалпоғистонда, Хоразм вилоятида 23 февралда ёғингарчилик (ёмғир, қор) бўлади, 24 февралда ёғингарчилик кутилмайди. 24-25 февралда Қорақалпоғистонда ҳарорат кечалари -17…-22 совуқгача, кундуз кунлари -10…-15 совуқгача, Хоразм вилоятида кечалари -12…-17 совуқгача, кундуз кунлари -5…-10 совуқгача пасаяди.

23-25 февралда баъзи жойларда шамол 17-22 м/с гача кучайиши кутилмоқда, баъзида эса 25-28 м/с гача кучайиши мумкин.

Жиззахда пластмасса қувурлари ишлаб чиқарувчи корхонада ёнғин содир бўлди

0

Бугун, 19 февраль куни соат 09:05 да Жиззах шаҳар “Саноат А” ҳудудида жойлашган “MASTER BILDING PRODOKT” пластмасса қувурлари ишлаб чиқариш қўшма корхонаси худудида жойлашган компрессор биносида ёнғин юзага келганлиги тўғрисида ёнғин-қутқарув хизматига хабар келиб тушган.

ФВВ хабарига кўра, ёнғин ўчириш экипажлари воқеа жойига соат 09:10 да етиб боришган, ёнғин соат 09:18 да ўраб олиниб, 09:40 да тўлиқ ўчирилган.  

Ёнғин натижасида бинонинг тахминан 90 кв.м майдонида шифт қисми ҳамда  ускуналари ёнган. Олиб борилган ҳаракатлар натижасида ишлаб чиқариш цехининг 1400 кв.м майдони ёнғиндан сақлаб қолинган. 

Тан жароҳати олганлар ва ҳалок бўлганлар қайд этилмаган. Ҳозирда ёнғин сабаби ва моддий зарар миқдори аниқланмоқда.

2030 йилгача аҳолининг электр энергиясига бўлган эҳтиёжи тўлиқ қондирилади

Ўзбекистоннинг 2030 йилга қадар ижтимоий-иқтисодий ривожлантириш Концепциясини тасдиқлаш тўғрисида президент фармони лойиҳаси эълон қилинди.  

Унга кўра, ижтимоий ривожланишнинг мақсадлари сифатида қуйидагилар белгиланди:

–  аҳолининг, шу жумладан унинг заиф қатламларининг сифатли таълим, соғлиқни сақлаш хизматларидан, қулай яшаш шароитларидан фойдаланиш имкониятларини ошириш, шунингдек ёш аҳолининг 50 фоизини олий таълим билан қамраб олиш;

–  ўртача умр кўриш давомийлигини 74,6 ёшдан (2018 йил) 78 ёшгача ошириш, оналар ўлими коэффициентини учдан бирга, шу жумладан янги туғилган чақалоқлар ва беш ёшгача бўлган болалар ўлимини икки баробарга камайтириш;

–  жон бошига ўртача уй-жой билан қамраб олинишини 15,5 квадрат метрдан (2019 йил) 20 квадрат метргача етказиш (ёки ўртача 5 кишилик оилага 100 квадрат метр) ва мамлакатни урбанизациялаш даражасини 60 фоизгача ошириш;

–  аҳолини тоза ичимлик суви билан таъминлаш даражасини йирик шаҳарларда 98 фоизгача, туманларда эса 95 фоизгача ошириш;

–  республиканинг йирик шаҳарларида 87 фоиздан ортиқ ва вилоятлар марказларида аҳолининг 54 фоизидан кўпроғини канализация тизимига улашни таъминлаш, шунингдек аҳолининг электр энергиясига бўлган эҳтиёжини тўлиқ қондириш.

Шунингдек, аҳоли жон бошига тўғри келувчи ЯИМ миқдорини 2025 йилда $2500 ҳамда 2030 йилда $4 минг доллардан юқори бўлишини таъминлаган ҳолда республиканинг Жаҳон банки таснифи бўйича “юқори ўрта даромадли” мамлакатлар гуруҳига кириши учун замин яратилади.

Ўзбекистон интернет тезлиги бўйича халқаро рейтингдаги ўрнини яхшилаб олди

Ookla компаниясининг Speedtest.net сервиси 2021 йил январь ойи натижаларига оид янги маълумотларни эълон қилди. Унга кўра, Ўзбекистонда аниқланган ва мобиль интернет тезлиги бўйича ўсиш қайд этилди.

Унга кўра, аниқланган интернет тезлиги (Fixed Broadband) бўйича Ўзбекистон умумий рейтингида иккита позицияга кўтарилиб, 94-поғонани эгалламоқда. Юклаш бўйича тезлиги эса 34,62 Мбит/с ни ташкил этди.

Мобиль интернет тезлиги бўйича ҳам ижобий кўрсаткич қайд этилди. Ўзбекистон яна иккита поғонага кўтарилиб, ҳозирги кунда 128-позицияни эгалламоқда. Мобиль интернет тезлиги эса 12,94 Мбит/с ни ташкил этди.

Ўзбекистон АКТ вазирлиги таъкидича, сўнгги икки йилда Ўзбекистонда интернет тезлиги 3 бараварга – 10,89 Мбит/с дан 34,26 Мбит/с гача ўсган. Бу борада умумжаҳон рейтингида эса 2020 йил бошида 104-ўриндан 94-ўрингача кўтарилган.

Алишер Усмонов ўз ҳисобидан Ўзбекистонга 500 мингта вакцина олиб беради

Шавкат Мирзиёев 1 млн доза вакцинадан 500 мингини Алишер Усмонов ўз ҳисобидан олиб беришини таъкидлади.

– У менга Наманганни яхши кўраман, шунинг учун битта илтимосим, 50 мингта вакцинани наманганликларга беринг, деди.

3 трлн сўм захирада пул таёрлаб қўйганмиз. Аммо шошилмаймиз. Энг маъқулини, иқлимимизга, халқимизга мосини топишимиз керак.

Кўнгилни хотиржам қилинг, бу масалани ўйлаяпмиз. Синовларни ўтказяпмиз, қайсиниси маъқул бўлса, албатта олиб келамиз, — деди Шавкат Мирзиёев.

“Тошкент метрополитени” УК “Ўзбекистон темир йўллари” АЖ тузилмасидан чиқарилмоқда

“Тошкент шаҳар транспорти соҳасида бошқарув тизимини тубдан такомиллаштириш тўғрисида”ги президент қарори лойиҳасига мувофиқ, Транспорт вазирлиги Тошкент шаҳар транспорт бошқармаси негизида Тошкент шаҳар транспорт бош бошқармаси ташкил этилмоқда.

Унга шаҳар транспортини тартибга солиш ва ривожлантириш бўйича қатор вазифалар юклатилди.

Шунингдек, “Тошкент метрополитени” УК “Ўзбекистон темир йўллари” АЖ тузилмасидан чиқариб, Тошкент шаҳар транспорт бош бошқармасига ўтказилади.

Аввалроқ, президент мутасаддиларга Тошкент шаҳар жамоат транспортини ягона тизим асосида тартибга солиш, молиялаштириш ва табақалашган тарифларни белгилаш бўйича топшириқ берганди.

Катта Фарғона каналидан “Жигули” чиқариб олинди. Унинг салонида 4 ёшли қиз ҳам бўлган

0

Катта Фарғона каналининг Боғдод тумани Ултарма МФЙ ҳудудидан оқиб ўтувчи қисмидан сувга тушиб кетган автомашина ва унинг салонидан уч кишининг жасади чиқариб олинди.

Маълум қилинишича, Бувайда тумани Қўнғирот МФЙда истиқомат қилувчи фуқаро ўз бошқарувидаги ВАЗ 2101 автомашинасида канал қирғоғидаги йўл бўйида ҳаракатланаётиб, каналга тушиб кетади. 

Автомашина салонида Бувайда туманида яшаган турмуш ўртоғи ҳамда 4 ёшли қизчаси бўлган. Уларнинг барчаси ҳалок бўлган.

Суриштирув жараёнларида 2019 йилнинг ноябридан буён ушбу оилада ўзаро низо бўлиб келаётгани, хотин ота-онасиникига кетиб қолгани, бироз вақтдан сўнг эса эр турмуш ўртоғини ота-онасидан кечирим сўраш шарти билан яна қайтариб олиб келгани ойдинлашди. 

Аммо ўзаро келишмовчиликлар барҳам топмасдан, ҳодиса содир бўлган куни эр хотини ва қизини қайнонасининг уйига олиб бориб ташламоқчи бўлиб канал ёқалаб автомашинасини бошқарган. 

Бахтсиз ҳодисага автомобиль салонида ўзаро жанжалнинг давом этган бўлиши мумкинлиги сабаб сифатида кўрсатилмоқда.

Айрим ОТМларда давлат гранти асосида “Сунъий интеллект” йўналишлари очилади

Президентнинг “Сунъий интеллект технологияларини жадал жорий этиш учун шарт-шароитлар яратиш чора-тадбирлари тўғрисида”ги қарори эълон қилинди.  

Қарор билан 2021-2022 ўқув йилидан бошлаб грант асосида “Сунъий интеллект” йўналиши бўйича кадрлар тайёрлаш босқичма-босқич бошланадиган ҳамда сунъий интеллект технологияларини амалий қўллаш бўйича ўқув курслари ва фанларини жорий қилиш кўзда тутилган ОТМлар рўйхати тасдиқланди.

2021/2022 ўқув йилидан бошлаб қарор иловаларида кўрсатилган ҳар бир ОТМга камида бир нафар етакчи хорижий эксперт ва олимни сунъий интеллект ва уни қўллаш технологиялари соҳасида ўқитишда иштирок этиш учун жалб қилинади.

Хорижий экспертлар ва олимларни олий таълим муассасаларига жалб қилиш билан боғлиқ харажатлар уларнинг бюджетдан ташқари маблағлари ҳисобидан қопланади.

Журналист ва блогерлар ҳам COVID-19’га қарши биринчи эмланадиганлар тоифасига киритилди

Кеча, 17 февраль куни АОКАда бўлиб ўтган брифингда Коронавирусга қарши курашиш штаби аъзоси Нурмат Отабеков COVID-19’га қарши вакцинани қўллаш билан боғлиқ муҳим масалалар хусусида тўхталиб ўтди.

Қайд этилишича, коронавирусга қарши вакциналар март ойининг бошларида Ўзбекистонга келтирилади ва аҳоли вакиллари тоифаларга ажратилиб, эмлаш ишлари олиб борилади. Биринчи навбатда, хавф ости гуруҳига мансуб аҳоли қатлами эмланади. 

Унга кўра, Соғлиқни сақлаш вазирлигининг буйруғи билан дастлаб:

– 65 ёшдан катталар;

– тиббиёт ходимлари;

– сурункали касаллиги мавжуд ёки диспансер ҳисобида турадиганлар;

– қуролли кучлар ва ҳуқуқ-тартибот органлари тизими ходимлари;

– журналистлар, блогерлар;

– мактабгача таълим ва халқ таълими ташкилотлари ходимлари;

– хорижда ўқиётган талабалар ва меҳнат мигрантлари эмланиши кўзда тутилмоқда.

Подпишитесь на нас

51,905участниковМне нравится
22,962участниковЧитать
6,260участниковПодписаться
×