Украина президенти Владимир Зеленский 3 сентябр куни кечки мурожаатида мудофаа вазири Алексий Резниковни ишдан бўшатишга қарор қилганини айтди. Қарор Олий Рада томонидан тасдиқланганидан кейин унинг ўрнини Давлат мулк жамғармаси раҳбари Рустем Умеров эгаллайди.
 
«Aлексей Резников 550 кундан ортиқ давом этган кенг кўламли урушни бошдан кечирди. Мен вазирликка янги ёндашувлар ва ҳам ҳарбийлар, ҳам бутун жамият билан ҳамкорлик қилишнинг бошқа шакллари керак, деб ҳисоблайман”, — деди Украина президенти.
 
“Энди вазирликка Рустем Умеров раҳбарлик қилиши керак. Украина Олий Радаси бу одамни яхши билади ва жаноб Умеровга бошқа изоҳ керак эмас. Парламентдан бу номзодни қўллаб-қувватлашини кутаман. Куз — кучайиш вақти”, деди Зеленский.

Умеров қрим-татар миллатига мансуб, у 1982 йилда Самарқанд вилоятида туғилган. 1944 йилда Умеровлар оиласи Қримдан Ўзбекистонга депортация қилинди ва фақат СССР парчаланиши фонида яриморолга қайтишга муваффақ бўлди.

Давлатимиз раҳбарининг 24 август кунидаги Самарқандга ташрифи анчадан бери кутилаётган эди. Бошқа вилоятларда бўлгани каби бу ерда ҳам амалдорларнинг ишдан олиниши хусусида гап-сўзлар айланиб юрган эди. “Вилоят ҳокими ишдан кетармиш, ўрнига бош прокурор ўринбосарларидан бири келармиш”, “шаҳар ҳокимига иш оғирлик қилмоқда, ўрнига шаҳарни яхши биладиганлардан келса керак”, деган миш-мишлар урчиган эди. 

Аммо бундай бўлмади. Ҳамма “катталаримиз” ўз ўрнида қолди. Хўш, бу яхшими ёки ёмон?

Ҳамма гап масалага қандай ёндошишга боғлиқ. Ушбу мавзуда гап кетганда, аксарият суҳбатдошларим вилоят ҳокими Эркинжон Турдимовнинг ўз ўрнида қолганлигини ижобий баҳолашмоқда. Уларнинг далиллари қуйидагича: “Э.Турдимов вилоятни яхши ўрганиб олди, кимдан нимани ва қандай талаб қилишни билади. Тажрибали раҳбар ва ташкилотчи. Янги ҳоким келса, яна ўз одамлари – “земляклари”ни лавозимларга қўйишни ўйлайди, туғилиб ўсган қишлоғию туманини обод қилишга ресурсларни йўналтиради. Э.Турдимов бу борада вазифасини бажариб бўлди: Қўшработ –  обод, “земляклар” – рози. Эндиликда ўз имижини сақлаш, номига гард юқтирмасликка интилса керак. Агар шундай бўлса, бу вилоят ободлигию аҳоли фаровонлиги учун хизмат қилади”.

Охирги икки йилда Э.Турдимовнинг кадрлар сиёсатида ижобий ўзгариш бўлганлигини кузатиш мумкин. Вилоят даражасидаги турли лавозимларга кадрларни тайинлашда туғилган жойига қараб эмас, ишчанлиги эътиборга олинган ҳолда тайинланмоқда. Улар орасида вилоят маркази ва унинг атрофидан бўлганлар ҳам бор. Ҳатто авваллари, халқ тили билан айтганда, “бир дипломат пул бериб” ишга кириладиган лавозимга ҳам раҳбар тайинлаб, унга “мана, мен сендан ҳеч нарса олмадим, сен ҳам ҳалол ишла”, дегани ҳақида  эшитган эдим.

Энди ҳалол ва пок ишлаш вилоятдаги барча амалдорлардан талаб қилиниши лозим. Ҳеч бир идорада ҳокимнинг ўз “любимчиги” бўлмаслиги керак. Раҳбар билиб хато қилдими, жиноятга қўл урдими, қилмишига яраша жазоланиши зарур. Шахсан ҳокимга ёки жамиятга қандай хизмат қилган бўлганлигидан қатъий назар! Менимча, 23 йил давомида ҳокимлик лавозимида ишлаб келаётган Эркинжон Оқбўтаевичга энди шахсан хизмат қиладиганларга эҳтиёж қолмаган бўлса керак. Демак, бу ёғи – фақат вилоят равнақи ва халқ фаровонлиги йўлида фидокорлик!

Энди “катталаримиз”нинг ўз ўрнида қолдирилишининг иккинчи томони ҳақида. Самарқанд шаҳар ҳокими Фазлиддин Умаров ўз ўрнида қолганлиги ҳақида турлича фикрлар билдирилмоқда. Ҳокимни билганлар уни яхши одам, хушмуомала, бошқалар фикрини эшитадиган раҳбар сифатида таърифлашмоқда. Аммо “яхши одам” ва “яхши раҳбар” тушунчалари доим ҳам бир-бирига мос келавермайди. Барча яхши одам ва ўткир мутахассис ҳам раҳбарликни тўлақонли олиб боролмайди. Бунинг учун алоҳида истеъдод керак, раҳбарда одамлар билан, жамоа ичида ишлаш кўникмаси шаклланган бўлмоғи зарур.

Агар солиқ тизимида ёки банкда йиллар давомида ишлаган, иш хонасидан чиқмаган раҳбар ходим бир юмалаб ҳоким бўлиб қолса, ўнлаб йўналишлар ва улар ичидаги минглаб муаммоларга дуч келади. Бундай вазиятда у нима қилишини билмай, боши гангиб, муаммолар гирдобидан чиқолмай қолади.

Бир ярим йил давомида Самарқанд шаҳар ҳокими лавозимида ишлаётган Ф.Умаров ва уни ушбу лавозимга тавсия этганлар бу ҳақиқатни англаганга ўхшайди. Акс ҳолда, Шавкат Мирзиёев унга қарата “иложи борича Самарқанднинг оғирлигини билдинг, Тошкентга қайтмоқчисан. Тошкентга қайтмайсан, шуни билгин», демасди.

Аммо, фикри ожизимча, шаҳар ҳокимини жойига қайтариш лозим эди. Акс ҳолда ўз соҳасининг яхши биладиган, соҳани бошқара оладиган раҳбардан ажраламизу, лекин самарали фаолият юрита оладиган ҳокимга эриша олмаймиз. Айниқса, Самарқанд бир миллионлик шаҳар бўлиши кутилаётганлигини назарга оладиган бўлсак, бундай катта ҳудудни бошқариш учун шунга мос салоҳият зарур бўлади.

Ёки, айримлар уқтираётгандек, шаҳар ҳокими ҳозир вилоятнинг кучли таъсири остида ўз имкониятларини ишга сола олмаяптими? Мустақил бўлгач, ўзини намоён қиладими? Билмадим, буни ҳам вақт кўрсатади.  

Аслида, янги ишга келган ҳоким ҳудуд билан, унинг қўлидан бир иш, оғзидан маслаҳат чиқадиган одамлари билан яқиндан танишиб, уларга таянган ҳолда иш юритса, мақсадга эришади. Мақсади яратувчанлик бўлганларга ёрдам қўлини чўзса, уларни қўллаб-қувватласа, улар ҳам оёққа туриб олгач, ҳудуд равнақи учун ҳеч нарсани аямайди. Ҳокимнинг бир оғиз гапи уларга кифоя.

Эндиликда давлатимиз раҳбарининг ҳокимларга нисбатан талаб ўзгармоқда, уларни сайлаш ҳақидаги фикрлар ўртага ташланди. Бу бир томондан. Бошқа томондан, аҳоли ҳам ҳокимларни мутлақ ҳукмдор деган тушунчадан узоқлашмоқда. Уларнинг ножўя хатти-ҳаркатлари муҳокама марказига айланмоқда. «Ҳокимлар ҳудудларнинг беги эмас, халқнинг ёлланма ишчиси» деган ақида одамларимиз онгига сингиб бормоқда.

Шундай экан, энди ишлайдиганлар, қўлидан аниқ бир иш келадиган, бошқалар оғирини енгил қила оладиганлар ўз ўрнини билган ҳолда давлат бошқарув органига ишга келсин. Ҳар ким қўлидан нима иш келишини билиб, ўз “потологи”ни англаган ҳолда мансаб отига минишга розилик берсин. Акс ҳолда, ўзини ҳам, атрофидагиларни ҳам, тизимни ҳам дабдала қилади. Тепадагилар ҳам ўзига яқинларни бир лавозимга тайинлашдан аввал “иним, қўлингдан ўзи нима иш келади” деб сўраши, салоҳияти ва имкониятини ўрганиши, кейинчалик ўзини ҳам, уни тавсия қилганларни ҳам шарманда этмаслигига ишонч ҳосил қилмоғи керакдир, балки?!

Тошпўлат Раҳматуллаев,

Самарқанд вилояти бўйича ўз мухбиримиз

Ўзбекистонда юлдуз тоифасига эга меҳмонхоналарга доир талабларни белгилайдиган давлат стандарти қабул қилинди. Бу ҳақда Туризм қўмитаси хабар берди.

Қайд этилишича, президент қарорига кўра, 2023 йил 1-октябргача хорижий консалтинг компанияларини жалб қилган ҳолда камида 50 та меҳмонхонага “тўрт юлдуз” ва 200 тасига “уч юлдуз” олиб бериш чораларини кўриш вазифаси белгиланган.

Шу сабабли Туризм қўмитаси томонидан туризм соҳаси илғор ривожланган давлатларнинг меҳмонхоналарга юлдуз тоифасини белгиловчи ҳужжатларининг талаблари ўрганилди.

Ўрганиш натижасида, амалдаги давлат стандарти талаблари қайта кўриб чиқилди ва балли таснифлаш орқали юлдуз тоифасини берувчи янги стандарт лойиҳаси Ўзбекистон меҳмонхоналар уюшмаси билан биргаликда ишлаб чиқилди. Янги давлат стандартига киритилган талаблар Hilton, Hampton by Hilton, Hyatt Regency Tashkent, Wyndham Hotels & Resorts меҳмонхоналари бизнес вакиллари ва бошқа меҳмонхона вакиллари билан келишилди.

Ушбу давлат стандарти меҳмонхоналарни балли асосда таснифлаш тизимини белгилайди. Тоифалар “*” (юлдуз) белгиси билан белгиланади ва бешта тоифа бўйича таснифланади. Жойлаштириш воситалари учун – энг юқори тоифа “*****” (беш юлдуз) ва энг паст “*” (битта юлдуз) ҳисобланади.

Жойлаштириш воситалари мазкур давлат стандартининг иловасига мувофиқ таснифланади. Бунда “м” бажарилиши мажбурий бўлган талабларни белгилайди. Мажбурий бўлмаган талаблар бажарилганда эса қўшимча балл берилади. Баллар йиғиндисига кўра тегишли юлдуз тоифаси берилади.

Янги давлат стандарти 2023 йилнинг 7 ноябридан амалга жорий этилади.

Ўзбекистон Республикаси Давлат Мустақиллигининг 32 йиллги нишонланаётган шу кунларда Нукус гарнизонидаги ҳарбий қисмларнинг бирида кичик дала ўқув майдони фойдаланишга топширилди.

Қуролли Кучлар тизимида олиб борилаётган ислоҳотлар кўп йиллардан бери оғриқли бўлиб келган муаммоларни ҳал этиш, ҳарбий хизматчилар учун хавфсиз хизмат шароитларини яратиш, армиянинг жанговар қудрати ва салоҳиятини юксалтиришга қаратилгани билан аҳамиятли бўлмоқда. Ана шундай ўзгаришлар сабаб, бугун Мудофаа вазирлиги қўшинларида мавжуд бўлган ҳарбий объектлар инфратузилмаси такомиллаштирилиб, замон талабига мос бўлган янги ижтимоий ва жанговар тайёргарлик объектлари бунёд этилмоқда. Бунинг натижасида армиянинг қудрати ортиб, жанговар тайёргарлиги сезиларли даражада юксалди.  

Нукус гарнизонида жойлашган ҳарбий қисмларнинг бирида илгари ташландиқ бўлган қарийб 1,5 гектардан ортиқ ҳудудда кичик дала ўқув майдони барпо этилиб, унда 10 та шаҳарчадан иборат 50 га яқин ўқув жойи яратилди.  

Объектни фойдаланишга топшириш маросимида Шимоли-ғарбий ҳарбий округ қўшинлари қўмондони, генерал-майор Фарҳоджон Шерматов, Нукус ҳарбий прокурори, адлия полковниги Улуғбек Абдураҳимов, Қуролли Кучлар фахрийлари ҳамда ҳарбий хизматчилар иштирок этди.  

Жиззахда Зомин аэропорти фойдаланишга топширилди. Бу ҳақда Жиззах вилояти ҳокимлиги хабар қилмоқда. 

“Президентимиз ташаббуси бидан амалга ошаётган ушбу лойиҳанинг амалга оширилиши Зомин аҳолиси даромадининг кўпайишига ва ёшлар бандлигини таъминлашга хизмат қилади. Зеро лойиҳа ортидан маҳаллий аҳоли ишлаб, даромад топадиган кўплаб инфратузилмалар, жумладан, умумий овқатланиш, транспорт, сувенирлар, ресторанлар, кафелар ва бошқа хизмат кўрсатиш турлари ривожлантирилади”, — дея таъкидлади вилоят ҳокими Эргаш Салиев.

“Трес 001” қурилиш ташкилоти томонидан бунёд этилган Зомин аеропорти 30 ўринга мўлжалланган йўловчи терминалига эга бўлиб, қуриш учун 60 гектар ер майдони ажратилган. Объектда жами 200 дан зиёд ходимлар ва 110 та техникалар билан ишлар олиб борилмоқда.

Шунингдек, ҳозирда аэропорт инфратузилмаси, мухандислик коммуникацияси, учиш-қўниш, харакатланиш йўлаклари ва перронни лойиҳалаш ҳамда қурилиш, учиш ва қўнишни таъминлаш бўйича радио ва аеронавигация ускуналарини харид қилиш, ўрнатиш ва эксплуатация қилиш ишлари белгиланган режа асосида олиб борилмоқда.

Маълумот учун: 2022 йилнинг октябр ойидан бошлаб Зоминнинг Даштобод шаҳарчаси темир йўл бекатига “Афросиёб” тезюрар поезди тўхташи ташкил этилган эди.

Uzbekistan Airways компанияси Чехияда ишлаб чиқарилган LET L-410 русумли иккинчи енгил самолётни қабул қилди. Ушбу самолёт Ўзбекистоннинг Зомин, Зарафшон, Шаҳрисабз, Сўх ва бошқа шаҳарларига парвозларни амалга оширади.